Mańǵystaý oblysynyń ákimi Nurlan Noǵaev apparat jıynynda sý tushytatyn zaýyt qurylysyna qarjy salýǵa daıyn ınvestordyń tabylǵanyn aıtyp, Aqtaý qalasynyń ákimine jobany jedeldetýdi tapsyrǵan bolatyn.
50 ga jerde syıymdylyǵy 40 myń tekshe metr sý basseınderi men sýdy tushytatyn qondyrǵylar boı kóteredi. Investısııalyq jobanyń quny – 4 mlrd teńge.
– Jýyrda Prezıdenttiń Mańǵystaý oblysyna kelgen sapary barysynda sý máselesin sheshý týraly tapsyrma berilgen bolatyn. Halyqty úzdiksiz aýyz sýmen qamtýǵa baǵyttalǵan jobalardy jedeldetýge kiristik. Sý tushytatyn zaýyt salýǵa kelisken ınvestormen qajetti kelisimder jasaldy, – dedi Aqtaý qalasynyń ákimi Nurdáýlet Qılybaı.
Jańa zaýyttyń josparlanǵan qýaty – 20 myń tekshe metrden astam. 2022 jyly iske qosylatyn jobanyń alǵashqy kezeńinde táýligine 5 myń tekshe metr sý óndirilmek.
– Tehnıkalarymyz jetkilikti. Kanal qazý jumystaryn bastap kettik. Qajetti qurylǵylarǵa tapsyrys berip jatyrmyz. Bir bóligi AQSh, Eýropa elderinen, endi bir bóligi Irannan jetkiziledi, – dedi joba quryltaıshysy Esman Jumabaev.
Sonymen aqtaýlyq turǵyndar úshin ózekti máseleni, ıaǵnı jazben birge aıqaı-shýy qatar bastalatyn aýyz sý máselesin sheshý baǵytyndaǵy jumystar bastaldy.
