Astana Mining & Metallurgy 11-shi taý-ken metallýrgııa kongresi ótip jatyr

Astana Mining & Metallurgy kongresi - sala mamandary kezdesetin, ýaǵdalastyqqa qol jetkizetin, kelisimder men kelisim-sharttar jasalatyn tıimdi alańǵa aınaldy. Is-sharaǵa sheteldik mamandardyń qatysýy tájirıbe almasýǵa jáne jańa sheshimderdi qabyldaýǵa yqpal etedi.

Bul forým alǵash ret 2010 jyly Qazaqstan Respýblıkasynyń Tuńǵysh Prezıdenti Nursultan Nazarbaevtyń qoldaýymen jáne tikeleı qatysýymen ótti. Búginde «AMM» kongresi taý-ken metallýrgııa keshenindegi mańyzdy máselelerdi talqylaý jáne sheshý úshin mańyzdy halyqaralyq alań bolyp tabylady.

Aıta ketý kerek, taý-ken metallýrgııa kesheni Qazaqstan ekonomıkasynyń qozǵaýshy kúshi bolyp tabylady, onyń úlesine eldiń JIО́-niń 8,2%-ǵa jýyǵy, ulttyq eksporttyń 24%-ǵa jýyǵy tıesili jáne salada 230 myń otandasymyz qajyrly eńbek etýde.

Bıylǵy sharanyń basty taqyryby «Pandemııa jaǵdaıynda álemdik taý-ken ónerkásibiniń ósý vektorlary». Jalpy kongress baǵdarlamasy jańa tehnologııalar men sıfrlyq sheshimder boıynsha sessııalardy, geologııalyq barlaý, 4.0 ındýstrııasynda jańa quzyretterdi damytý máseleleri boıynsha sheberlik synyptaryn qamtıtyn bolady.

Sonymen qatar, kongress aıasynda altyn jáne kómir ónerkásibi boıynsha forýmdar men GR, PR, HR baǵyttarynda sheberlik sabaqtary ótedi. Shara uıymdastyrýshylary AIX-pen áriptestikte taý-ken salasyna ınvestısııalar tartý boıynsha dóńgelek ústelder ótkizedi. Kongrestiń ekinshi kúni AMM delegattary «Kazsınk» JShS jáne «ArselorMıttal Temirtaý» AQ syndy iri taý-ken óndirýshi kompanııalarynyń jetkizýshileri bolýdy úırenedi.

Qazaqstan TKMK salasynyń bolashaǵy-geologııalyq barlaýǵa ınvestısııa salý, sapaly kadrlyq áleýetti damytý jáne jańa tehnologııalardy engizýmen baılanysty. Sol sebepti kongress baǵdarlamasyn sapaly toltyrý salanyń problemalyq máselelerin barynsha tolyq ashýǵa jáne olardy sheshý joldaryn tabýǵa múmkindik beredi.

Dástúr boıynsha Astana Mining & Metallurgy taý-ken metallýrgııalyq kongresi aıasynda kórme ótýde.

AMM kórmesi-taý-ken metallýrgııa salasynyń kompanııalary úshin ozyq tehnologııalar men ınnovasııalyq ázirlemelerdiń alańy bolyp tabylady. Munda kórmege qatysýshylar paıdaly qazbalardy izdeýge, óndirýge jáne baıytýǵa arnalǵan jabdyqtar men tehnologııalardy usynady.

Sonymen qatar, AMM kórmesiniń qatysýshylaryna óz kompanııasyn joǵary úkimettik deńgeıde usyný, memlekettik qurylymdardyń ókilderimen, sala sarapshylary jáne iri kompanııalardyń basshylarymen jańa áriptestik baılanys ornatý múmkindigi beriledi.

Kórmege ArselorMıttal Temirtaý, Eýrazııalyq Top, Kaz Minerals, Kazakhmys, Kazzinc, Polymetal jáne t. b. kompanııalar qatysýda.