Ishki ister mınıstriniń orynbasary Sáken Sársenov Aqtóbede Prezıdenttiń qaýipsizdikti qamtamasyz etý salasyndaǵy sıfrlandyrý jónindegi tapsyrmalarynyń iske asyrylýyn baqylady.
Jumys sapary aıasynda QR IIM orynbasary Sáken Sársenov oblystyq bilim berý uıymdary ortalyǵynda beınebaqylaý júıesiniń engizilýimen tanysty.
S.Sársenov jappaı beınebaqylaý júıesin engizý barysyn, polısııa qyzmetkerleriniń kómegimen Jedel basqarý ortalyǵyn jańǵyrtýdy, «Azamattardyń habarlamalaryn birjaqty qabyldaý» jobasyn iske asyrýdy, polısııa narıadtarynyń geoderekterin GPS trekerlerinen elektrondyq kartaǵa aýystyrýdy zerttep, kólik aǵynyn baqylaý júıesimen tanysty.
Sapar barysynda Ishki ister mınıstriniń orynbasary Aqtóbe oblysynyń ákimimen kezdesti. Kezdesýde Memleket basshysynyń qylmystyq isterdi tergep-tekserýdi elektrondyq formatqa kóshirý, sondaı-aq halyqpen ózara is-qımyl jasaıtyn tergeýshilerdiń, jedel ýákilderdiń jáne ishki ister organdarynyń basqa da qyzmetkerleriniń kabınetterinde beınebaqylaý kameralaryn ornatý jónindegi tapsyrmalarynyń óńirde iske asyrylý barysy talqylandy.
«Ákimdik tarapynan qajetti materıaldyq qoldaý kórsetildi. 1-jeltoqsannan bastap barlyq kabınetterde kameralar bolady dep josparlap otyrmyz», dedi Sáken Sársenov.
Mınıstr orynbasary №23 jáne №64 jalpy bilim beretin mektepterdegi qaýipsizdiktiń tehnıkalyq qamtamasyzdandyrý jaǵdaıymen tanysty. «Qulager» balabaqshasyna jáne Aqtóbe polıtehnıkalyq kolledjine baryp, uıymdardaǵy shtattan tys jaǵdaılar kezindegi is-qımyl tártibin baǵalady.
Sapar sońynda Sáken Sársenov Alǵa jáne Hromtaý aýdany polısııa bólimderiniń jabdyqtalýymen jáne ishki ister organdarynyń qyzmetkerleri paıdalanatyn tehnıkalyq quraldarmen tanysty.
