Tehnologııa • 26 Qazan, 2021

Qazaqstandaǵy eń úzdik IT-startaptarǵa 10 myń dollar beriledi

28-29 qazanda ótetin Digital Bridge-2021 halyqaralyq forým aıasynda dástúr boıynsha eldiń úzdik tehnologııalyq startaptary anyqtalady, dep habarlaıdy Egemen.kz.

Dana MYRZAQADIR

Osy jyly Astana Hub Battle jarysynyń júldelik qory I oryn úshin $10 myń, II orynǵa $5 myń jáne III orynǵa $3 myń quraıdy.

Startaptarǵa qatysý úshin qoıylatyn basty sharttar: MVP nemese MVO satysyndaǵy eksportqa shyǵýǵa áleýeti bar joba, komandada kem degende 2 negizgi adamnyń bolýy jáne jobanyń naryqtaǵy tájirıbesi 2 jyldan aspaýy tıis. Astana Hub Battle-2021 barysy qandaı?

Saıtta suranym bergen 100 básekege qabiletti joba jartylaı fınalǵa ótip, 28 qazanda 1-mınýttyq prezentasııamen Digital Bridge alańynda mamandardyń aldynda sóz sóıleıdi.

Qazylar alqasynyń sheshimimen 29 qazanda 10 úzdik joba digitalbridge.kz bas sahnasynda óz jobasy týraly 3-mınýttyq prezentasııasyn ótkizedi.

Irikteýdiń eki kezeńiniń nátıjelerimen battl júldegerleri anyqtalady.

Astana Hub tehnoparkiniń bas dırektory Maǵjan Madıevtiń aıtýynsha, is-shara birinshiden, Qazaqstandaǵy startap-ekojúıesiniń jańa talanttaryn aıqyndaýǵa jáne jobalar damýdyń jańa deńgeıine kóterilýine qoldaý kórsetý úshin uıymdastyryldy. «Jyldan jylǵa startaptar arasynda báseke uıymdastyrý arqyly biz birneshe maqsattardy kózdeımiz: ekojúıeniń jańa qatysýshylaryn tabý, otandyq startap-mádenıetin dáripteý jáne eldegi tehnologııalyq kásipkerlikti damytý», deıdi Maǵjan Madıev.

О́tken jyldardyń baıqaýlarynyń jeńimpazdary bolyp KidSecurity, Abscrypt, Antidolg, Smart Gas, WebTotem men Kompra atandy, olar búgingi kúni qazaqstandyq IT-naryǵynda sátti damyp, óz ónimderin shetelge eksporttaýda.