Is-shara Qazaqstannyń Túrkııadaǵy elshiliginiń qoldaýymen uıymdastyryldy. Oǵan Qazaqstannyń Túrkııa elindegi Tótenshe jáne О́kiletti Elshisi Abzal Saparbekuly, professorlar, TúrkSOI ókilderi, belgili aýdarmashy Ashýr О́zdemır qatysyp, pikirlerimen bólisti.
Kitaptyń tanystyrylymynda sóz sóılegen Elshi A. Saparbekuly Baýyrjan aqynnyń shyǵarmashylyǵy jaıly oıymen bólisti.
«Baýyrjannyń jyrlary Qazaqstanda ǵana emes, ózge memleketterde de tanyla bastady. Túrik oqyrmandarynyń qatysýymen ótip jatqan is-shara ortasynan tabylǵanymyzǵa qýanyshtymyz», dedi ol.
«Kitap – rýh dárýmeni, adamzattyń aqyl-oıyn vırýstan qorǵaıtyn úmit vaksınasy» degen avtor is-sharany uıymdastyrǵan azamattarǵa alǵysyn aıtty. Sondaı-aq ol aýdarmashy Ashýr О́zdemırge rızashylyǵyn jetkizdi. О́z kezeginde Ashýr О́zdemır de Baýyrjan Qaraǵyzulynyń shyǵarmashylyǵy jaıly jyly pikirin bildirdi.
«Qazaq poezııasynda qazirgi nemese dálirek aıtsaq, postmodernıst qazaq aqyndary arasynda Baýyrjan Qaraǵyzulynyń orny erekshe hám mańyzdy ekenin aıtqym keledi. Ár aqyn óz ustanymyn dástúrge degen kózqarasymen anyqtaıdy. Dástúr – aqynnyń ózine deıingi búkil poezııa jınaǵy. Osy turǵydan alyp qarasaq, Baýyrjan Qaraǵyzulyn dástúrdi joqqa shyǵaratyn aqyn deý durys bolmas. Sebebi Baýyrjan Qaraǵyzuly postmodernızmge dástúrden bas tartqany úshin emes, dástúrden basqa joldy alǵysy kelgendikten bet burǵan», deıdi aýdarmashy Ashýr О́zdemır.
Is-shara sońynda avtor oqyrmandardyń san túrli saýaldaryna jaýap berdi.
