Alash qozǵalysynyń jetekshisi, kórnekti memleket jáne qoǵam qaıratkeri Álıhan Nurmuhameduly Bókeıhannyń ǵumyrnamasy men tarıhı tulǵasyn zerdeleýge arnalǵan zertteý eńbeginiń tusaýkeseri Semeı qalasynda Álıhan Bókeıhan atyndaǵy ýnıversıtet qabyrǵasynda ótti.
Kitaptyń tusaýkeser rásimine zııaly qaýym ókilderi, ǵalymdar, joǵary oqý oryndardyń oqytýshylary men bilim alýshylary, ákimshilik ókilderi, saıası partııalar men qoǵamdyq uıymdardyń ókilderi, mýzeıler men kitaphanalardyń basshylary, arhıv qyzmetkerleri men BAQ ókilderi qatysty. Rásimdi áleýmettik jeliler men ZOOM vıdeo baılanys júıesi arqyly Qazaqstan men Reseıden myńdaǵan kórermender tamashalady.
Eki jarym jyldan astam ǵylymı izdenisteriniń nátıjesinde jaryq kórgen eńbeginde ǵalym Álıhan Bókeıhanǵa – Qazaqstan tarıhyndaǵy tutas dáýirdiń – aýmaqtyq, saıası, qoǵamdyq bytyrańqylyq merziminen bastap, El táýelsizdigin alǵanǵa deıingi kezeńniń ón boıyna yqpal etken tulǵa degen retinde baǵa beredi. Qazaq memlekettiliginiń qalyptasýynda aıryqsha ról atqarǵan qaıratkerdi avtor «dáýir adamy» dep atady.
Kitapqa derekkózder, materıaldar men faktiler, onyń ishinde ǵylymı aınalymda buryn paıdalanylmaǵan derekter, ıaǵnı muraǵattyq qujattar, memýarlar, saıası jáne memlekettik, partııa jáne áskerı qaıratkerlerdiń estelikteri, sol jyldardaǵy gazetter men jýrnaldardaǵy jarııalanymdar engizilgen. Kitap tarıhshylarǵa, qoǵamtanýshylar men saıasattanýshylarǵa, stýdentterge, sondaı-aq kópshilik oqyrman qaýymǵa arnalyp jazylǵan.
Aıta ketsek, rásim barysynda ǵalymǵa saltanatty túrde Álıhan Bókeıhan ýnıversıtetiniń qurmetti professory ataǵy berildi.
Aldaǵy ýaqytta kitap tanystyrylymy Shoqan Ýálıhanov atyndaǵy Tarıh jáne etnologııa ınstıtýtynyń uıymdastyrýymen Nur-Sultan, Almaty, Pavlodar jáne Qaraǵandy qalalarynda ótedi. Kitap qazaq tiline de aýdarylatyn bolady.
