Bir apta buryn oblys ákimi Qumar Aqsaqalov oblys turǵyndaryna arnaıy úndeý jarııalap, saıası mańyzy zor memlekettik sharaǵa belsendilikpen qatysýdy ótindi. Jýyrda oblys ákiminiń orynbasary Ǵanı Nyǵymetov pen oblystyq statıstıka departamentiniń basshysy Maral Nurjaýypova jýrnalısterge brıfıng berip, sanaqtyń aralyq qorytyndalary týraly baıandap berdi. Aldymen 10 jylda bir ret ótkiziletin ulttyq sanaqtyń mańyzdylyǵy týraly sóılegen Ǵanı Saqtaǵanuly bul is-shara ekonomıka men saıasatta strategııalyq boljamdar men josparlar qurý, halyq sanynyń ózgerý barysyn saraptaý úshin asa qajet ekenin jetkizdi. Búgingi tańǵa deıin soltústikqazaqstandyqtardyń 90 paıyzy sanaqtan ótken eken. 8 qarashaǵa deıin sozylatyn qalǵan kúnderde turǵyndardyń sanaqtan tolyq ótý qajettigi aıtyldy.
M.Nurjaýypova oblys aýdandary arasynan búginge deıin sanaqty aıaqtaýǵa Esil, Qyzyljar jáne Aqqaıyń aýdandary jaqyn ekenin aıtty. Bulardyń kórsetkishteri 98%-ǵa jetken. «Onlaın sanaqqa eń belsendi qatysqan Aqjar, Mamlıýt jáne Ýálıhanov aýdandary. Al Aqqaıyń, Qyzyljar jáne Esil aýdandary turǵyndarynyń 65-68%-y dástúrli formatty tańdady. Onlaın sanaqtan ótý múmkindigi 1 qyrkúıek pen 15 qazan aralyǵynda usynylǵan bolatyn. Biraq turǵyndardyń kóptegen ótinishine baılanysty jáne sanaqpen halyqty qamtý kólemin ulǵaıtý maqsatynda onlaın sanaq osy jyldyń 1 qarashasyna deıin uzartyldy. Oblystyń árbir turǵyny sanaqtan sanaq.gov.kz
saıtynda óte alady», dedi statıstıka departamentiniń basshysy.
Oblysta úı-úıdi aralaý 1 qazanda bastalǵan. Biraq, ókinishke qaraı, keıbir turǵyndar Halyqqa qyzmet kórsetý ortalyǵynda barlyq aqparat bar dep, esik ashýdan, suraqqa jaýap berýden bas tartqan. «Alaıda árbir adam boıynsha memlekettik organdardyń barlyq aqparaty qupııa ekenin atap ótkim keledi, ony eshkim buza almaıdy. Eshqandaı aqparattyq júıede azamattardyń dinı ustanymy, tilderdi bilýi, kommýnıkasııalarmen qamtamasyz etilýi týraly derekter jáne t.b. joq. Aqparattyq júıe qansha damysa da halyq sanaǵyn ótkizý barysynda alynǵan aqparattyń teńdesi joq», dedi M.Nurjaýypova.
Sanaq ótkizý ádisnamasyna sáıkes 8 qarashaǵa deıin baqylap aralaý qarastyrylǵan. Iаǵnı taǵy bir aptaǵa jaqyn ýaqyt boıy úılerdi aralaý jalǵasady. Árbir qazaqstandyqty qamtıtyn mańyzdy is-sharanyń abyroımen ótkeni qajet.
Soltústik Qazaqstan oblysy
