3 qarasha kúni saǵat 11:58-de Jezqazǵan qalasynyń ortalyq aýrýhanasy ǵımaratynan órt shyqqany týraly habarlama kelip tústi. Shaqyrtý ornyna TJD-niń 24 adamy men 7 tehnıkasy jiberildi. 4-qabattaǵy palatada aýdany 10 sh.m. alańdy jalyn sharpydy.
«О́rt ornynan 1961 jyly týǵan naýqastyń denesi tabyldy. Qylmystyq is qozǵaldy. Búgingi tańda aýrýhana shtattyq rejımde jumys isteýde», dep habarlady Qaraǵandy oblysy Densaýlyq saqtaý basqarmasynyń baspasóz qyzmeti.
«Qaraǵandy oblysy TJD kúshimen jedel qabyldanǵan sharalardyń arqasynda órt saǵat 12:21-de sóndirildi. О́rttiń shyǵý sebebi men naýqastyń neden qaza bolǵany anyqtalyp jatyr», dedi oblystyq TJD baspasóz qyzmeti.
Qaraǵandy oblysynyń Densaýlyq saqtaý basqarmasy qaıtys bolǵan naýqastyń týystary men jaqyndaryna kóńil aıtady.
