Ulttyq baılanys operatorynyń málimetine súıensek, 10 aıdyń ishinde kúngeı aımaqta 100-den astam kópqabatty turǵyn úı osyndaı tásilmen tapsyrylyp, 10 myńnan asa azamat ǵalamtor jelisine esh kedergisiz kirýge múmkindik aldy.
Bıylǵy 10 aıda iri baılanys operatory elimizdegi 500-ge tarta kópqabatty turǵyn úıge ınternet tartyp, páter ıeleriniń qonys toıyna jaǵymdy syılyq jasaldy.
«Elimizdiń iri qalalarynda abonentterdi tikeleı magıstraldi júıege qosý arqyly ınternetpen qamtý máselesi birneshe jyldan beri sheshilip keledi. Endi bul tehnologııa jańadan salynyp jatqan turǵyn úı keshenderine de keńinen qoldanylýda. Bul jerdegi kúrdeli másele – magıstraldi jelini kópqabatty úılerge deıin jetkizý, ıaǵnı ınternet qosylǵan núkteden jelini turǵyn úıge deıin ákelý ońaı bolmaı tur. Al abonentterdi qosý nebári 20-30 mınýtta júzege asyrylady. Eger de aldaǵy bolashaqty baǵamdasaq, abonentterdiń ınternettiń sapasyna baılanysty talaptary tek kúsheıe bermek. Bul rette GPON tehnologııasy osy talaptarǵa tolyq jaýap beredi dep aıta alamyz», dedi «Qazaqtelekom» AQ bólshek bıznes dıvızıonynyń bas dırektory Igor Pogrebıskıı.
Gigabit PON tehnologııasy qazir ulttyq kompanııanyń talshyqty-optıkalyq magıstralge qosylýdyń eń tıimdi ári joǵary suranysqa ıe joly. Onyń artyqshylyǵy sol, tutynýshy men magıstraldi jelini ózara baılanystyratyn ár páterge arnaıy arna qurýdy kózdeıdi. Sondyqtan bul tehnologııaǵa qosylǵan abonentter ınternet jyldamdyǵyna alańdamasa da bolady deıdi mamandar. Taǵy bir artyqshylyǵy – jalǵyz ǵana jeli arqyly jyldamdyǵy 500 Mbıt/s quraıtyn ınternetpen qosa televızııa jáne telefonııa qyzmetin qostyrýǵa bolady. Al sıfrly telefonııa abonent kóship ketken jaǵdaıda da nómirdi saqtap qalýǵa múmkindik beredi.
Tehnologııanyń bul artyqshylyqtaryn turǵyndardan buryn, kópqabatty turǵyn úı keshenderiniń qurylysyn oryndaǵan kompanııalar baǵalap úlgergen. Aıtalyq, elimizdiń soltústiginde jyl basynan beri 14 turǵyn úı kesheni ınternetke qosylǵan soń tapsyrylypty.
Jańa salynǵan úılerdi birden jyldam ınternetpen birge tapsyrý baǵytyndaǵy ilkimdi ister ońtústik óńirde jolǵa qoıylǵan. Munda 10 aıdyń ishinde 100-den astam kópqabatty turǵyn úı kesheni ınternetke qosylyp, myńdaǵan jańa abonentke sıfrly múmkindikterdi keńinen paıdalanýǵa jaǵdaı jasaldy.
Almaty qalasy men Almaty oblysy da bul tizimniń alǵashqy úshtiginde. Atap aıtqanda, ulttyq kompanııa Jetisý óńirinde jyl basynan beri 90-ǵa jýyq turǵyn úıdi GPON tehnologııasymen jyldam ınternetpen qamtydy.
