– Serik, júlde qutty bolsyn! Chempıonatta saǵan qandaı mindet júkteldi?
– Rahmet! Jarysqa qatysqan sportshynyń bir ǵana mindeti bar, ol – jeńiske jetip, top jarý. О́kinishke qaraı, fınalda súrindim. Altyn júlde alyp, eldiń Ánuranyn Belgrad tórinde shyrqata almaǵanym úshin jankúıer qaýymnan keshirim suraımyn. Osyǵan da shúkirshilik etemin. О́ıtkeni bul júldeniń ózim týyp-ósken óńir – Pavlodar oblysy úshin mańyzy zor. Chempıonat barysynda qate-kemshilikter ketti. Endi solarmen jumys istep, olqylyqtardyń ornyn toltyrýǵa tyrysamyz. Buıyrtsa, kúmisti altynǵa aınaldyramyn.
– Fınalda sylbyr kórindiń. Jeńiske jetýge ne kedergi boldy?
– Aqtalǵandaı bolamyn ǵoı. Degenmen fınalǵa sharshańqyrap jetkenim ras. О́ıtkeni aqtyq jekpe-jekke deıin bes boksshymen judyryqtastym. Ishinde osaly joq. Aldymen Mońǵolııa ókili Enh-Amar Harhýýdy jeńdim. Ol – Azııa chempıony. Odan keıin japonııalyq Reıto Sýsmıdi jarys jolynan yǵystyrdym. Bul jigit – jastar arasyndaǵy álem chempıony. Sosyn úndistandyq Rohıt Mordyń osal tusyn taýyp, shırek fınalda reseılik Edýard Savvınmen bokstastym. Jartylaı fınaldaǵy qarsylasym kýbalyq Osvel Kabalero Garsııa boldy. Kýbalyqtardyń qandaı deńgeıdegi boksshylar ekeni belgili ǵoı. Al fınalda AQSh quramasynyń ókili Djamal Harvıge ese jiberdim. Sońǵy qarsylasym óte jyldam eken. Keıbir tusta onyń jyldamdyǵyna ilese almaı jattym. Basqa da qatelikterge jol berdim. Endigi maqsat – Belgradta ketken eseni qaıtarý.
– Jartylaı fınalda kýbalyq boksshyny nokdaýnǵa jiberip, jeńiske jettiń. Myqty qarsylastyń mysyn basý qıynǵa tústi me?
– Árıne. Qazaqstan men Kýba boksshylary – rıngtegi bitispes qarsylastar. Sondyqtan mundaı jekpe-jekterdiń mańyzy zor. Menimen judyryqtasqan Osvel Kabelero Garsııa myqty boksshy. Tájirıbesi de tolysqan. Panamerıka oıyndarynyń chempıony degen ataǵy bar. Jekpe-jekke deıin onyń judyryqtasý mánerin zerttedik. Buǵan deıingi kezdesýlerine taldaý júrgizdik. Sonyń nátıjesinde dittegen maqsatymyzǵa qol jetkizdik.
– Tokıo Olımpıadasynda basqa Serikti kórdik. Álem birinshiliginde sharshy alańǵa múlde basqa Serik shyqqandaı áser qaldyrdy. Bul jaıynda ne aıtasyń?
– Ekeýi de iri jarys, biraq atmosferasy bólek. Olımpıadada jibergen kemshilikterdi álem chempıonatynda qaıtalamaýǵa tyrystyq. Qatemen jumys júrgizdik. Sonyń nátıjesi bolar, bálkim.
– Joǵaryda bul júldeniń Pavlodar óńiri úshin mańyzy zor dep qaldyń. Nege?
– О́ıtkeni bul – álem chempıonattarynan pavlodarlyq boksshylarǵa buıyrǵan alǵashqy medal. Jalpy, men Táýelsizdik alǵaly beri álem chempıonatyna qatysqan ekinshi pavlodarlyq ekenmin. Buǵan deıin Nıkolaı Kýlpın 1993 jylǵy birinshilikte +91 kıloda judyryqtasyp, ¼ fınalǵa deıin jetipti. Ol kisini kórgen joqpyz. 2003 jyly qaıtys bolyp ketipti. Mine, sodan beri 28 jyl ótkende, Táýelsizdiktiń 30 jyldyǵynda osyndaı tarıhı jetistikke qol jetkizgenime qýanyshtymyn. Jeke bapkerim Azamat Maqajanovqa aıtar alǵysym sheksiz. Onyń da álem chempıony ekenin jaqsy bilesizder. Áskerıler arasynda top jarǵan. Bapkerimniń sol bir jeńisti jolyn Belgradta jalǵastyrýdy kózdep edim. Reti kelmedi. Alda áli talaı jarys bar. Chempıon tuǵyrynda turatyn sát týaryna senemin.
– Senimiń aqtalsyn!
Áńgimelesken
Farhat QAIRATULY,
«Egemen Qazaqstan»
