Nur Otan Ekologııa mınıstrliginiń jumysyn synǵa aldy

Ekologııa, geologııa jáne tabıǵı resýrstar vıse-mınıstri Ahmetjan Pirimqulov partııalyqtardy «Jasyl Qazaqstan» ulttyq jobasyn júzege asyrý jospary týraly habardar etti. Onyń aıtýynsha, sýarý kezindegi sý shyǵynyn qysqartý úshin 401 kanaldy rekonstrýksııalaý jáne taǵy 212-sin sıfrlandyrý josparlanyp otyr.

«Syrdarııa ózeniniń problemalaryn sheshý jáne Aral teńiziniń soltústik bóligin saqtaý jumystaryn jalǵastyramyz. 4 kól – Býrabaı, Shortandy, Qopa, Shalqar qalpyna keltiriledi. Turmystyq qatty qaldyqtardy kádege jaratý úlesi qaldyqtardy energetıkalyq ýtılızasııalaý nysandaryn salý esebinen 18-den 34%-ǵa deıin ósedi. Jalpy, ulttyq jobany iske asyrý arqyly 60 myńǵa jýyq jumys orny ashylady», dedi vıse-mınıstr.

Vedomstvonyń qaldyqtardy óńdeýge qatysty kemshilikterine Keńes tóraǵasynyń orynbasary, Májilis depýtaty Edil Jańbyrshın nazar aýdardy. Onyń aıtýynsha, kóptegen óńirlerde qoqysty bólek jınaý prosesi jolǵa qoıylmaǵan.

«Bizdegi turmystyq qatty qaldyqtardy jınaý jáne tasymaldaý operatorlary, polıgondardyń ıeleri jáne qaıta óńdeýshi kompanııalar bir-birinen múldem bólek salada jumys istep jatqandaı. Quramynda synaby bar qaldyqtardy jınaýǵa arnalǵan konteınerlerdiń jaǵdaıy she? Kezinde mundaı konteınerler Aqtaýda qoıylyp edi. Biraq olar áldeqashan synǵan. Mundaı qaldyqtar qazir qaıda tasymaldanady, olardy kim joıady? Tek konteıner ornatýmen másele sheshilmeıdi», dedi Edil Jańbyrshın.

Sonymen qatar Keńes múshesi, Májilis depýtaty Dúısenbaı Turǵanov Jaıyq ózeniniń jaıyn qozǵady.

«Talqylaýmen aınalysyp kele jatqanymyzǵa 10 jyldan astam ýaqyt boldy. Áli kúnge deıin naqty is-áreket joq. Tek qana zertteý. Jaıyqty erekshe memlekettik mańyzy bar sý nysandarynyń qataryna qosýdy surap bir jyl buryn resmı saýal joldadym, biraq áli kúnge deıin eshteńe jasalmady», dedi halyq qalaýlysy.

Ekologııa mınıstrligini jumysynyń jabyqtyǵyna Nur Otan partııasynyń Batys Qazaqstan oblystyq fılıaly janyndaǵy ekokeńes tóraǵasy Darhan Sarıev nazar aýdardy.

«Qazaqstan-Reseı komıssııasynyń Jaıyq boıynsha jumysy jasyryn júrgizilýde. Eshqandaı aqparat joq. Jalpy bizdegi sýǵa qatysty problemalar – gıdrologııalyq analıtıkanyń álsizdiginiń saldary. Máselen, oblystaǵy jeke kompanııalardyń birinde 18 gıdrologııalyq beket bar, al memlekette búkil óńir boıynsha bar bolǵany 20 ǵana. Olar barlyq negizgi sý nysandaryna jetpeıdi. Jer asty sýlary boıynsha da zertteýlerdiń bar-joǵy túsiniksiz», dedi Darhan Sarıev.

О́z kezeginde Nur Otan partııasy Qaraǵandy oblystyq fılıaly janyndaǵy ekologııalyq keńestiń múshesi Dmıtrıı Kalmykov Ekologııa mınıstrliginiń Qoǵamdyq tyńdaýlar ótkizýdiń jańa erejeleri jobasyn synǵa aldy.

«Qujat tolyqqandy qoǵamdyq tyńdaýlardy ecoportal.kz-te qaralatyn qujattarǵa birjaqty pikir bildirýge aýystyrýdy qarastyrady. Sonymen qatar munda turǵyndardyń suraq qoıýǵa jáne olarǵa jaýap alýǵa múmkindigi joq. Ýákiletti organ azamattardyń aqparatqa jáne sheshim qabyldaý rásimine qol jetkizý quqyqtary men múmkindikterin edáýir qysqartýdy usynatyny ereje jobasyn taldaýdan anyq kórinedi», dedi Dmıtrıı Kalmykov.

Otyrys barysynda nurotandyqtar partııanyń óńirlik fılıaldary janyndaǵy Ekologııalyq keńester jumysynyń aralyq qorytyndysyn shyǵardy. Mysaly, Soltústik Qazaqstan oblysynda Aıyrtaý jáne Ǵ.Músirepov atyndaǵy aýdandarda ýran ken oryndaryna qatysty máselelerdiń túıini tarqaýǵa taıaý. Qazirgi ýaqytta aýdandyq ákimdiktermen óńdelgen ýran kenishteri kommýnaldyq menshikke qabyldanyp, aýyldyq okrýgter ákimdikteriniń balansyna bekitildi.

Bıyl 100 myńnan astam aǵash otyrǵyzylǵan Qyzylorda oblysynyń ekologııalyq problemalary da óz sheshimin tabýda.

Almaty qalasynda partııa músheleriniń belsendi jumysynyń arqasynda qoqystardy shyǵarý jáne barlyq beı-bereket qoqys oryndary joıyldy. Keńes tóraǵasy Eldos Abaqanov atap ótkendeı, partııanyń saılaýaldy ýádeleri aıasynda Almatyda JEO-2-ni gazǵa kóshirý jáne 1 mln. aǵash otyrǵyzý qarastyrylǵan. Turmystyq qatty qaldyqtardy qaıta óńdeý jáne kádege jaratý úlesi 8-den 14%-ǵa deıin ósti.

Jıyn qorytyndysynda Ekologııa mınıstrligine birqatar usynymdar ázirlendi. Atap aıtqanda, «Jasyl Qazaqstan» ulttyq jobasynyń iske asyrylýyna partııalyq monıtorıngti qamtamasyz etý, qaldyqtardy basqarý salasynda ozyq tehnologııalardy odan ári engizý. Sonymen qatar Jaıyq ózeniniń problemalaryna qatysty Keńes arnaıy otyrys ótkizedi.