Kartına Abaıdyń shyǵarmashylyǵyna tikeleı baılanysty bolmasa da, onyń ómirine, otbasyna qatysty dramalyq kórinisti beıneleıdi. Abaıdyń 15 jasynda ata saltymen aıttyrylyp kelgen Dildá báıbishe men arada 15 jyl ótken soń aqynnyń ózi súıip alǵan jary Áıgerim beınesi arqyly otbasylyq dramany kórsetken.
Birinshi sýrette ataqty Alshynbaıdyń qyzy, tekti de tegeýrindi Dildá qyzyl tazyny – «qyzǵanyshtyń qyzyl ıtin» tejep ustap, Áıgerimniń otaýyna – toqaldyń qutty shańyraǵyna kóziniń alasymen qarap tur. Tazynyń qarǵysy – qaqtaǵan kúmis bolǵanymen, aýzyndaǵy tumyldyryq – qyzǵanyshtyń zalalsyzdyǵyn, ózgege zııany tımeıtinin baıqatqandaı. Al ekinshi kartınada ázız jandy Áıgerim qolyn qýsyryńqyraı ustap, júzin tómen salǵan. Kúnásiz bolsa da kináli beıne syndy.
Kompozısııada Abaı beınesi kórinbese de qatysyp tur: osy dıptıh arqyly uly oıshyldyń parasaty men mahabbaty, dástúr men júrek qalaýy qatar kórinedi. Sonymen birge áıel zatynyń jumbaq jan-dúnıesi, qyzǵanysh sezimi beınelengen. Ol sezim alǵashqy kartınadaǵy qyzyl tazy men Dildániń qamzol astynan kıgen qyzyl keýdeshesi bolyp kórinse, ekinshi sýrettegi Áıgerimniń qyzyl tysty bórigi men bastan-aıaq qyzyl kóılegi arqyly kórinis tapqan.
Mine, bir qaraǵanda bir-birine qarama-qarsy beıneler uly Abaı obrazy arqyly bútindelip, bir sheńberge syıyp tur. Kartınanyń buǵan deıin Abaı Qunanbaıuly taqyrybyna salynǵan ózge shyǵarmalardan ereksheligi de osynda.
Batys Qazaqstan oblysy
