Bas múftı apattan zardap shekken turǵyndardy sabyrǵa shaqyryp, aýrýhanada aýyr hálde jatqan naýqastarǵa Alladan shıpa tiledi.
«Qaıǵyly oqıǵa barshamyzdyń janymyzǵa qatty batty. Qaıǵylaryńyzǵa ortaqpyz. Elimizdegi barsha din qyzmetkerleri men musylman qaýymy sizderdiń otbasylaryńyzǵa duǵa jasaýda. Alla Taǵala aýrýhanada aýyr hálde jatqan jandardyń tez arada saýyǵyp, ortalaryńyzǵa aman-esen oralýyn násip etkeı. Jaratýshy Jabbar Iemiz bul synaqtyń sońyn jaqsylyqqa, qýanyshqa ulastyrǵaı. Sizderge Alladan kórkem sabyr tileımiz. Biz árqashan sizdermen birgemiz» dedi Naýryzbaı qajy Taǵanuly.
Aıta ketsek, jýyrda Aqmola oblysynyń Shortandy kentinde gaz ballony jarylyp, 3 adam kóz jumdy, taǵy on adam aýrýhanaǵa tústi. Oqys oqıǵa 3 páterli turǵyn úıde bolǵan. Gaz ballonynyń jarylýy saldarynan 3 páterli jeke úı órtenip, onyń bir bóligi qulaǵan. Úıindi astynan 3 adamnyń denesi tabyldy. Onyń bireýi kámeletke tolmaǵan bala.
Qazaqstan musylmandary dinı basqarmasy qaıǵyly jaǵdaıǵa baılanysty marqumdardyń otbasyna qarjylaı kómek kórsetti.
