Vıskonsın shtatyndaǵy Ýokesho qalasyndaǵy Rojdestvo sherýi kezinde jol talǵamaıtyn kóliktiń adamdardy jappaı basýy saldarynan 52-81 jas aralyǵyndaǵy bes adam mert boldy dep habarlandy. Búginde zardap shekkender sany 48-ge jetti.
Polısııanyń málimdemesine sáıkes, 39 jastaǵy kishi Darrel Edvard Brýks qamaýǵa alynǵan, oǵan bes adamdy qasaqana óltirdi degen aıyp taǵylady. Ýokesho qalasynyń polısııa departamenti bolǵan oqıǵany lańkestik áreket dep baǵalamaıdy.
Qurbandar men zardap shekkender arasynda oqýshylar men egde jastaǵy adamdar bolǵan. Qazirgi kezde ondaǵan adam gospıtalderde jatyr. Vıskonsın shtatynyń balalar pedıatrııalyq aýrýhanasynyń málimetine sáıkes, 18 bala túrli bas jaraqattary jáne synyqtarymen aýrýhanaǵa túsken.
Dárigerlerdiń aıtýynsha, zardap shekkenderdiń arasynda 3 jastan 16 jasqa deıingi balalar bolǵan. 10 balaǵa qarqyndy terapııa pedıatrııalyq palatasynda kómek kórsetildi. Rım-katolık Mılýokı Arhıeparhııasy zardap shekkenderdiń qatarynda din qyzmetshisi, birneshe shirkeýge kelýshi jáne jergilikti katolık mektebiniń bilim alýshylary bar ekenin málimdedi.
Budan buryn AQSh-tyń Vıskonsın shtatyndaǵy Ýokesho qalasynda Rojdestvo sherýi kezinde avtoóliktiń adamdardy jappaı basqany týraly habarlanǵan bolatyn.
