Oqıǵa • 25 Qarasha, 2021

Atyraýda sábıin óltirgen áıelge qatysty sot úkimi shyqty

13 ret kórsetildi

Atyraýda sábıin birneshe ret pyshaqtaǵan áıel qylmystyq jaýapkershilikten bosatyldy, dep habarlaıdy Egemen.kz.

Qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotynda qaraldy. Aıyptalýshyǵa QR Qylmystyq kodeksiniń 99-babynyń 3-bóligimen 4 aılyq qyzyn qasaqana óltirdi degen aıyp taǵyldy.

Qylmystyq is medısınalyq sıpattaǵy májbúrleý sharalaryn qoldaný úshin sotqa berilgen edi. Sot talqylaýy kezinde mynadaı jaıt anyqtalǵan. 41 jastaǵy áıel 2020 jyldyń jeltoqsan aıynda qyzyn ómirge ákelgen. Bosaný kezinde jáne odan keıin anasy men balanyń densaýlyǵy qalypty, qanaǵattanarlyq jaǵdaıda bolǵan.

2021 jyldyń 26 sáýirinde úıinde óz qyzymen ońashada qalǵan. Qatty jylaǵan qyzyn tynyshtandyra almaǵan anasy ashý ústinde ashana bólmesinen qolyna pyshaq alǵan. Jylaýyn toqtatpaǵan qyzynyń dármensiz kúıde ekenin bilse de, óziniń qylmystyń nıetin júzege asyrý úshin nárestege dene jaraqatyn salǵan.

«Saraptama qorytyndysyna sáıkes, A.B. «Paranoıdty shızofrenııa» sozylmaly psıhıkalyq aýrýmen aýyrǵan jáne qazirgi kezde zardap shegedi. Psıhıkalyq aýrýy bala bosanǵannan keıin bolmaǵan. Sarapshylar qylmys jasaǵan ýaqytta ol óziniń jasaǵan áreketin túsinbegenin kórsetip, ony mamandandyrylǵan psıhıatrııalyq stasıonarda májbúrlep emdeýdi usynǵan. Sotta A.B.-nyń kinási jábirlenýshi jubaıynyń, kýálardyń jaýaptarymen, múrdeni qaraý hattamasymen, saraptama qorytyndylarymen, beınejazbalarmen dálelin tapty.

Sot qaýlysymen A.B.-nyń adam óltirýdi esi durys emes jaǵdaıda jasaǵany dáleldendi. Alaıda, sotpen qoldanylýy mindetti QR Qylmystyq Kodeksiniń 16-babynyń talabyna sáıkes qylmystyq jaýaptylyqtan bosatylyp, oǵan qatysty medısınalyq sıpattaǵy májbúrleý sharalary qoldanyldy», dep habarlady Atyraý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Sot qaýlysy zańdy kúshine engen joq.

Sońǵy jańalyqtar

Uqsas jańalyqtar