Júzi jyly, jany jaıdary

Ajal aıaq astynda degen sózdiń rastyǵyna osy joly aıqyn kóz jetkizgendeı boldym. О́ıtkeni, ústimizdegi jyldyń 17 qańtarynda Almatyda aqyn Qaırat Juma­ǵalıevtiń qyrqyna baryp kelmek bolyp ketken Turlyǵazy Sabyr­baıuly Dýanbek oılamaǵan jerde jol apatyna ushyrap, opat boldy. Bálkim, jer betindegi tatar dám taýsylarda týystarynyń nurly júzin sońǵy ret kórip qaıtýǵa Alla násip etti me, kim bilsin?! Úsh kúnnen keıin Astanada dosymyzdy, áriptesimizdi amalsyz jer qoınyna tapsyrdyq. Mine, sodan beri de 40 kún bolyp qalǵan eken. Meniń Turlyǵazymen tanys­ty­ǵym, dostyǵym, aralas-qura­las bol­ǵan ýaqytym nebári on úsh-on tórt-aq jyldaı boldy. Alaı­da, ol bizdiń ji­git aǵasy bolyp, aqyl toq­tatqan, sha­ǵy­myz bol­ǵandyqtan, onyń ár kúni, ár jyly umytylmastaı bolyp este qaldy. 2000 jyldyń 20 qarashasy kúni Astanadaǵy memlekettik «Elorda» baspasynyń tabaldyryǵyn attaǵanda alǵashqy bolyp qarsy alǵan baspa dırektory Turekeńniń ózi edi. Oǵan deıin kóp jyl aýdandyq gazette is­tep kelgendikten, jazyp-syzýǵa mashy­ǵym bolǵandyqtan baspadaǵy redaktorlyq mindetke tez tóselip kettim. Turlyǵazynyń negizgi maman­dyǵy polıgrafıst bolatyn. Más­keý­degi Polıgrafııa ınstıtýtyn bi­tir­gen. Almatydaǵy «Dáýir» bas­pa­synda, Res­pýblıkalyq Baspa, po­lıgrafııa jáne kitap saýdasy jónindegi komıtette, Qazaqstan Res­pýb­lıkasy Baspasóz já­ne aqpa­rat mınıstrliginde áralýan laýa­zymda qyzmet istegen bilikti maman eken. Baspa – «Astana polıgrafııa» aksıonerlik qoǵamynyń úıinde or­nalasqan. Sondyqtan kitap shyǵarý isin qoljazbadan bastap onyń basylyp shyqqanǵa deıingi prosesin túgeldeı óz qolymyzdan ótkizemiz. Sóıtip, kitap shyǵarýdyń barlyq erekshelikterin túgeldeı Turekeńnen úırendim desem, ol eshqan­daı artyq aıtqandyq emes. Onyń qolastyndaǵy qyzmet­ker­ler­ge renjip, daýys kótergenin, oryn­syz urysqanyn eshqashan kór­meppin. Birge qyzmet istegen qyzmetkerler ony árdaıym iltıpatpen eske alady. «Elorda» baspasynda Tur­ly­ǵa­zy Sabyrbaıulynyń bas­shy­lyǵy­men «Altyn qor», «Ǵıb­raty mol ǵu­myr», «Otyrar kitaphanasy», «Qa­zaq­stan táýelsizdigine 20 jyl» se­­rııa­­larymen kóptegen kórnekti aqyn- jazýshylardyń shyǵarmalary ja­ryq kórdi. Onyń bári – syrty ásem bezendirilgen, ádemi kitaptar edi. Bul serııalarmen shy­ǵarylǵan týyndylar Almatyda ótken halyqaralyq kitap kórmesinde san ret júldeli dıplomdarmen marapattalǵan. «Elorda» baspasyn memleket, qoǵam qaıratkerleriniń kitap­tary, Elba­synyń jyl saıynǵy Jol­daý­lary ár jyly kitapsha bolyp ja­ryq kórip jatatyn. Avtorlar da óz shyǵarmalaryn osy baspadan shy­ǵarýǵa umtylatyn. Turekeń táýelsizdiktiń alǵashqy jyldarynda jáne odan keıin birge qyzmet istegen polıgrafısterdiń eńbek­terin jo­ǵary baǵalaıtyn. Turlyǵazy Sabyrbaıuly ózine óti­nishpen kelgen adamǵa qolynan kelse qol ushyn berýge, kómektesýge árqashan ázir turatyn. Kishipeıil, janashyr, ýádesine berik, bir sózdi azamat edi. Usaq-túıekti elep, eskere bermeıtin. Bııazy minezimen dos­tarynyń qurmetine bólenip júrip edi. Onymen birge qyz­met istep, aralas-quralas bolǵan árip­testeri adal da aqjarqyn azamatty tá­ýelsiz Qazaq eliniń polıgrafııa já­ne baspa isin damytýǵa ózindik úles qos­qan isker maman, tájirıbeli baspager re­tinde jaqsy biledi. Ol ulyn uıaǵa, qy­zyn qııaǵa qondyryp, nemere súıip ketti. Oǵan da shúkirshilik deımiz. Bitirgen isin eshkimge mindet qyl­maı, ol úshin eshkimnen madaq, syı-sııapat kútpeı, óz mindetin adal at­qaryp, dúnıeden ótken asyl azamattar az emes. Turlyǵazy sondaı jan­dardyń biri edi. «Qurdas, bári jaqsy bolady!» degen sózi qulaqtan keter me. Qaıyrdy NAZYRBAEV, «Nur Astana» baspasynyń dırektory.