Túrkııanyń Qazaqstandaǵy elshiliginiń qoldaýymen ótken kórmege atalǵan ortalyqtyń úsh oqýshysynyń 35 kartınasy usynyldy. Mazmundy is-sharanyń ashylýynda Túrkııanyń Qazaqstan Respýblıkasyndaǵy Tótenshe jáne ókiletti elshisi Ýfýk Ekıdjı sóz alyp, kórmeniń mańyzyna toqtalyp ótti.
− Nur-Sultan qalasynda Iýnýs Emre atyndaǵy túrik mádenı ortalyǵy on jyldan beri jumys isteıdi. Bul ortalyq túrik tilinen dáris berip qana qoımaıdy, túrli mádenı sharalardy ótkizýge uıytqy bolyp júr. Sonyń bir belgisi retinde búgingi kórmeni aıtýǵa bolady. Máselen, kez kelgen adam basqa elge saparlap barsa, sol jerdiń tabıǵaty men mádenıetin kórip, áserlenedi. Bizdiń jas sýretshilerimiz Túrkııaǵa baryp, sol eldi, jerdi kórgen áserlerin túrli-tústi boıaý túsimen kórkem jetkize bildi. Olar osy eńbekteri arqyly eki el arasyndaǵy mádenı baılanysty baıytyp otyr, − dedi elshi.
Kórmege sýreti qoıylǵan Iýnýs Emre túrik mádenıet ortalyǵynyń oqýshysy, jas sýretshi Álııa Sultanovanyń aıtýynsha, ol sýretti 5-synyptan bastap salady eken.
«Men Túrkııany kópshilik biletin emes, basqa qyrynan kórsetkim keldi. Osy kórmege 16 kartınam qoıyldy. Onyń ishinde Túrkııanyń halyq bıi «Zeıbek», «Dárýish bı», «Taksım tramvaıy», «Atatúrik» portretteri sekildi jumystarym bar. Solar arqyly Túrkııa eliniń salt-dástúri men mádenıetin tanystyrýǵa kúsh saldym» dese, taǵy bir jas sýretshi Nellı Úrkenova: «Sýretshiniń shyǵarmalary – onyń ishki oıynyń aınasy. Meniń meshitterge degen yqylasym bólek, al Túrkııadaǵy meshitter óte erekshe. Sondyqtan kartınalarymnyń kópshiliginde sony bederledim» dedi. Al úshinshi jas qylqalam sheberi Aınur Myrzahmetovanyń «Dárýish», «Túrik shaıy», «Baklava», «Túrik aıaq kıimi», «Kóz monshaq», «Galata munarasy» atty sýretteri kelýshilerdiń qyzyǵýshylyǵyn týǵyzdy.
