Tuńǵysh Prezıdentimiz, eń aldymen, Táýelsizdikti saqtaý jónindegi qasterli qundylyqqa nazar aýdarǵan. Shyn máninde, Táýelsizdikten artyq baqyt ta, odan asqan bereke de joq. Sondyqtan osy uǵymdy halyqqa jetkizý, elge túsindirý – bárimizdiń azamattyq paryzymyz. Erkin el bolmasaq, biz ótkenimizdi saralap, búginimizdi baǵamdap, bolashaǵymyzdy boljaı almaımyz. Sondyqtan eldigimizdi eńseli, egemendigimizdi baıandy etý – barshamyzdyń abyroıly mindetimiz.
Memleket retinde ósip-órkendeý úshin birlik pen kelisimniń mańyzy zor. Elbasy aıtqandaı, bul – eldigimizdiń myzǵymas tiregi. Rasymen, Qazaqstannyń búgingideı ordaly elge aınalýy – tatýlyq pen syılastyq arqasy. Biz bul turǵydan álemge úlgi kórsete aldyq. Osynyń bárin halqymyz «birlik bolmaı tirlik bolmaıdy» dep, bir-aq aýyz sózge syıdyra bilgen. Qazir syn-qaterler zamany dep jatyrmyz. Jer-jerde túrli jaǵdaılar bolyp jatqanyn da kórip otyrmyz. Al Qazaqstan sonyń bárinen birlik pen kelisimniń arqasynda aınalyp ótti. Osy baqytymyz uzaǵynan bolǵaı.
Elbasy aıtqan úshinshi tuǵyr – ata-babadan mıras bolǵan jerdi saqtaý. Menińshe, Jer men Táýelsizdik – egiz uǵym. Jerdi qorǵaý ol – Táýelsizdikti qorǵaý degen sóz. Babalarymyzdan qalǵan «ultaraqtaı jer qymbat» degen asyl sóz bar. Sondyqtan biz úshin jer – eń qymbat qazyna. Ony qasyq qanymyz qalǵansha qorǵaýymyz kerek.
Tuńǵysh Prezıdentimiz toqtalǵan tórtinshi dúnıe – salt-dástúr jáne otbasylyq qundylyq. Jasyratyny joq, keıingi kezderde otbasylyq qundylyqtyń tómendep ketkenin baıqap júrmiz. Elbasy sol sebepti, bul máselege basa mán berip otyr. Aldaǵy ýaqytta eldiktiń mańyzdy tiregi sanalatyn osy ınstıtýttyń deńgeıin kóterý úshin judyryqtaı jumylýymyz qajet. Bul jolda aýyldaǵy aq saqaldy atalarymyz ben aq jaýlyqty ájelerimizdiń sózderine qulaq túrý, soǵan toqtaý, sodan sabaq alý burynǵydaı ulttyq deńgeıge kóterilýge tıis. Biz «úlkenge – qurmet, kishige – izet» kórsete bilgen halyqpyz. Osy ulttyq kodymyzdy jańǵyrtyp qana qoımaı, turmys-saltymyzǵa erkin engizsek, biregeıligimizdiń irgesi bekı túseri sózsiz.
Nursultan Ábishuly atap ótken ulttyq mádenıetti saqtaý, bilim men eńbekke, pragmatızmge basymdyq berý – Táýelsizdigimizdi nyǵaıtý jolyndaǵy asa mańyzdy qundylyqtar. Munyń bári syn saǵatta ult bolyp uıysyp, el bolyp ilgeri jyljý úshin qajet. Sondyqtan Elbasy aıtqan jeti tuǵyrdyń máni men mańyzyn halyqqa keńinen túsindirýimiz kerek. Tipti bul qaǵıdattardy mektep baǵdarlamasyna engizip, óskeleń urpaqtyń sanasyna sińirýdiń de bereri mol dep esepteımin.
Ákim YSQAQ,
qoǵam qaıratkeri
