«Bas prokýratýranyń málimeti boıynsha, elimizde jyl saıyn kolledjder men ýnıversıtetterdiń shamamen 1,5 myń stýdenti qylmystyq jaýapkershilikke tartylady. 2020 jyly 18-30 jas aralyǵyndaǵy 4 207 jas esirtki zattaryn qoldanǵany úshin esepke alyndy. Olardyń ishinde ýnıversıtetterde oqıtyndar da az emes», dedi Aqylbek Kúrishbaev óz saýalynda.
Ol eldegi JOO-larda psıhologtardyń, teologtardyń, sport bazalarynyń jetispeıtinin, adamgershilik-patrıottyq tárbıeniń álsizdigin, shyǵarmashylyq belsendi jastardy damytýǵa tıisti kóńil bólinbeıtinin sóz etip, buǵan kóptegen is-sharalardyń resmı sıpatta ǵana júrgizilýi sebep ekenin túsindirdi.
«Qazir ýnıversıtet basshylary stýdentterge «tárbıelenýshi tulǵa» retinde emes, ýnıversıtetke «qarjy túsirýdiń kózi» dep tym jaıdaq qaraıdy. Anyǵyn aıtsaq, kóptegen joǵary oqý oryndarynda kadrlardy daıyndaý qarapaıym bızneske aınalyp ketti. Tipti, ýnıversıtetterdi akkredıtteý júıesinde stýdentterdiń tárbıe jumysy qarastyrylmaǵan. Jalpy, bizdiń tárbıe júıemiz ulttyq qundylyqtarymyzǵa negizdelýi kerek. О́kinishke oraı, sońǵy kezde, ásirese, halyqaralyq deńgeıdegi ýnıversıtetterde batystyq ustanymdarǵa elikteý oryn alýda», dedi senator.
Osyǵan oraı, Aqylbek Kúrishbaev ýnıversıtetterdegi tárbıe jumystarynyń jaı-kúıine synı taldaý júrgizýdi jáne ony qazirgi zamanǵy úrdister men damý basymdyqtaryna sáıkes sapaly jańa deńgeıge kóterý úshin qajetti sharalar qabyldaýdy usyndy.
