Búginde Qazaqstannyń damýynda Túrkitildes memleketterdiń yntymaqtastyq keńesiniń róli joǵary. Alqaly jıyn barysynda Eýrazııanyń mádenı jáne zııatkerlik ortalyǵy bolyp tabylatyn Qazaqstannyń túrki elderimen yqpaldastyǵynda Tuńǵysh Prezıdent – Elbasy ıdeıalarynyń mańyzy aıryqsha ekendigi aıtyldy. Elbasy bastamashy bolǵan Túrki ıntegrasııasy máseleleri búginde Prezıdent Qasym-Jomart Toqaevtyń basshylyǵymen jalǵasyn taýyp keledi.
Jıyndy Halyqaralyq Túrki akademııasynyń prezıdenti Darhan Qydyráli júrgizip, Túrki keńesi qurylǵannan bergi aralyqta túrki áleminiń qundylyqtary men múddelerin óńirlik jáne halyqaralyq arenada odan ári ilgeriletý máseleleri jemisin berip kele jatqandyǵyn atap ótti.
Búginde Túrki halyqtarynyń ıgiligi jolynda turaqtylyq, qaýipsizdik pen kópjaqty ekonomıkalyq yntymaqtastyqtyń mańyzy kún saıyn artyp keledi. Osy oraıda Tuńǵysh Prezıdent – Elbasynyń bastamasymen órkendep, damyp kele jatqan túrki áleminiń rýhanı astanasy – Túrkistan qalasynyń búgingi damý qarqyny, halyqaralyq bilim keńistiginde Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń elimiz ǵana emes, álemdik bilim men ǵylym keńistigindegi róline aıryqsha nazar aýdaryldy.
Jıyn barysynda Túrki yntymaqtastyǵyna qosqan úlesi úshin akademık, hımııa ǵylymdarynyń doktory, professor, UǴA prezıdenti Murat Jurynovqa Túrki akademııasynyń altyn medali tabys etildi.
Basqosýǵa qatysqan UǴA Prezıdıým músheleri, ǵylymı-zertteý ınstıtýttarynyń dırektorlary men joǵary oqý oryndarynyń rektorlary, ǵalymdar túrki álemindegi ıntegrasııa, ǵylym men bilimdi damytýǵa qatysty oılaryn ortaǵa saldy.
ALMATY
