Qazaqstan Prezıdenti Nursultan Nazarbaev Joǵary Eýrazııalyq ekonomıkalyq keńes otyrysyna qatysý úshin Máskeýge kelgen bolatyn. Keshe Reseı astanasynda ótken otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın jáne Belarýs Prezıdenti Aleksandr Lýkashenko, sondaı-aq, Eýrazııa ekonomıkalyq komıssııasy alqasynyń tóraǵasy Vıktor Hrıstenko qatysty, dep habarlady Qazaqstan Prezıdentiniń baspasóz qyzmeti.
Kezdesý barysynda Keden odaǵy men Birtutas ekonomıkalyq keńistik aıasyndaǵy ıntegrasııalyq úderisterdiń jaı-kúıi men perspektıvalary, sondaı-aq, JEEK-tiń burynǵy otyrystarynda qol jetkizilgen kelisimderdi iske asyrýdyń negizgi máseleleri talqylandy. Sonymen qatar, Eýrazııalyq ekonomıkalyq odaq qurý týraly shart jobasyna daıyndyq barysy qaraldy.
О́z sózinde Nursultan Nazarbaev Astanada Komıssııa ókilderimen kezdesý bolyp ótkenin habarlap, aýqymdy jumystar atqarylǵanyn atap ótti.
– Men qujattarmen tarmaqtary boıynsha jan-jaqty tanysyp shyqtym jáne bizdiń sarapshylarymyz óte úlken ári qıyn jumysty júrgizýde dep sanaımyn. Barlyq daýly máseleler jóninde de biz túsinistikke qol jetkize alamyz dep úmittenemin. Belgilengen kesteni saqtaýymyz qajettigi týraly pikirdi qoldaımyn. Sondaı-aq, memleketterimizdiń turǵyndaryna halyqtarymyzdyń ıgiligi, eýrazııalyq ekonomıkalyq ıntegrasııaǵa qosylǵan elderdiń paıdasy úshin bizdiń tarapymyzdan júrgizilip jatqan jumystyń qajettiligin belsendi túrde túsindirgen jón, – dedi Qazaqstan Prezıdenti.
Memleket basshysy Eýrazııalyq ekonomıkalyq odaq qurý týraly shart eki bólimnen – ınstıtýttyq jáne fýnksııalyq bólikterden turatynyn aıtty.
– Birinshi bóligine sáıkes halyqaralyq ekonomıkalyq uıym qurylady. Biz odaqtyń organdarynda taraptardyń ókilettiginiń teń bolýy jóninde ýaǵdalastyq. Osyndaı tájirıbe sottarmen qatar, basqa organdar apparattaryn qalyptastyrý kezinde de saqtalady. Memleket basshylarynyń sheshimderi bolashaq odaqtyń organy úshin mindetti bolýǵa tıis. Jańa múshelerdi qabyldaýǵa qatysty aıtsaq, ony «toptap» qabyldaý negizinde júzege asyrýǵa ýaǵdalastyq. Sharttyń fýnksııalyq bóligi boıynsha ekonomıkalyq odaq qurǵan jón ekenin atap ótpekpin. Bul tusta elderimiz ishinde túsinispeýshilik týǵyzatyn qosymsha máselelerdi engizýdiń qajeti joq, – dedi Nursultan Nazarbaev.
Qazaqstan Prezıdenti kelisilmegen jaıttardy birtindep retteý qajettigin atap ótti.
– Qalǵan máselelerdi kelisý úshin shartty qabyldaýdan bir aı buryn joǵary organnyń taǵy bir otyrysyn ótkizý kerek. Naqty sheshim qabyldaýymyz úshin alqanyń tóraǵasyna árqaısymyzben kezdesip, ustanymdarymyzdy kelisip alýǵa múmkindik bergen jón. Biz qazirdiń ózinde aıtarlyqtaı ilgeriledik, belgilengen merzimderden keshikpeýge tıispiz, – dedi Nursultan Nazarbaev.
Reseı Federasııasynyń Prezıdenti Vladımır Pýtın Reseı, Belarýs jáne Qazaqstan ıntegrasııa jolymen júıeli túrde ilgerilep kele jatqanyn, odan qazirdiń ózinde naqty nátıjeler men qaıtarymnyń baryn atap ótti.
– 2013 jyly álemdik ekonomıkanyń ósý qarqyny tómendegenine qaramastan, «úshtik» aıasyndaǵy taýar aınalymy azaıǵan joq, qaıta arta túsip, 64,1 mlrd. dollarǵa jetti. Reseı elderimiz arasyndaǵy ekonomıka salasynda qalyptasqan syndarly, teńquqyly jáne ashyq qarym-qatynastardy oń baǵalaıdy, – dedi Vladımır Pýtın.
Belarýs Prezıdenti Aleksandr Lýkashenko kezdesý barysynda shartqa kelisilgen merzimde qol qoıý úshin ózara tıimdi sheshimder tabylatynyna senimin bildirdi.
– Integrasııalyq jobamyzda biz naqty nátıjelerge qol jetkizýge tıispiz. Mundaı nátıje Keden odaǵyn qurý jónindegi jumystyń eshqandaı shekteýlersiz jáne olqylyqtarsyz aıaqtalýy bolmaq. Bul máselede, tipti, alǵa ilgeriledik. Biz tıisti sheshimder qabyldap, ekonomıkalyq odaq qurý baǵytynda alǵa qaraı meılinshe belsendirek qadam basqanymyz jón, – dedi Aleksandr Lýkashenko.
Sýretterdi túsirgender
S.BONDARENKO, B.OTARBAEV.
