Kezekti jeńis

Osynyń aldyndaǵy týrda Kýbada jergilikti qabylandardan 0:5 esebimen utylyp qaıtqan Astana Arlans komandasy Búkilálemdik serııanyń 10-týrynda 1 naý­ryz kúni Almatyda Poland Hussars boksshylaryn qabyldap, 4:1 etip utty. Kezdesýdi 52 kıloǵa deıingi salmaqtaǵy Ilııas Súleımenov pen Gjegoj Kozlovskı bastady. Nátıjesinde birinshi raýndta tóreshiler túgeldeı 10:9 esebimen basym­­­­dyqty alań ıesine berdi. Budan keıingi eki raýndta osy esep qaıtalandy. Sońǵy eki raýndta da onyń basymdyǵy eshkimniń kúmánin týǵyzbady. Qazaqstandyqtar osylaı alǵa shyqty – 1:0! Budan keıin rıngke bizden serııanyń debıýtanty – Ǵanı Jaılaýov shyqty. 60 kıloǵa deıingi salmaqtaǵy ol Davıd Pavel Mıhelýs esimdi qarsylasqa tap keldi. Birinshi raýndta azdaǵan artyqshylyq tanytqan bizdiń jigit, úshinshi raýndtan bastap tizgindi bermedi. Úshinshi bolyp rıngke kóterilgen álem chempıony 69 kıloǵa deıingi salmaqtaǵy Danııar Eleýsinov óziniń Búkilálemdik serııadaǵy debıýtin jeńis­pen aıaqtap qana qoıǵan joq, sonymen birge, óz boksshylarynyń kezdesýde utysqa qol jetkizýin qamtamasyz etti. Ol qo­naqtar sapyndaǵy legıoner Jora Sı­monıandy emin-erkin utty. Shamamen úshinshi raýndta-aq onyń jeńiske jetip turǵany aıdan anyq boldy. Esep – 3:0! Endi budan keıingi jigitterimizdiń júkteri jeńildedi. Bul jeńisti 81 kılodaǵy Ádilbek Nııazymbetov odan ári kóterip áketti. Ol 19 jasar Kasıýsh Zychınskıdi eki ret nokdaýnǵa túsirip, aıqyn basymdyqpen tize búktirdi. Al alań ıeleri sapyndaǵy jeńilisti armıan legıoneri Armen Sımonıan óz esebine jazdy. 91 kılodan aýyr salmaqtaǵy boksshy qazaqstandyq komanda quramyndaǵy tusaýkeser kezdesýin jeńilispen bastady. Ol polıaktar sapyndaǵy belorýs legıoneri Sergeı Verveıkodan utyldy. Sóıtip, esep 4:1 boldy. Endi Astana Arlans osy jeńisten keıin óz tobynda kýbalyqtardan keıingi ekinshi orynǵa ornyqty. Osymen ol pleı-off týrnırine de joldama alyp otyr. Serııanyń qazirgi jeńimpazy bolyp tabylatyn onyń sol jeńis úshin áli de kúresýine bolady. Damır QOJAMQUL. ALMATY.