Osy oraıda yrys pen qut daryǵan Osakarov aýdany týraly qysqa da nusqa aıta ketken lázim. Qazirgi tańda aýdandy kóptegen ult pen ulystyń balasynan quralǵan 30 myń adam meken etedi. Turǵyndarynyń basym kópshiligi aýyl sharýashylyǵymen aınalysady. Aýdannyń asta-tók astyǵy men mol kartoby ishki tutynýdy qanaǵattandyryp qana qoımaı, eksportqa da shyǵarylady. Mal sharýashylyǵy da damyǵan. Mysaly 1991 jyldan 2000 jylǵa deıin aýdannyń 39 memlekettik kásiporny sharýashylyq júrgizýdiń jańa túrine kóshirilgen eken.
Jalpy Osakarov aýdanyndaǵy ónerkásiptiń negizi «Kazakhmys Coal» JShS kómir kenishiniń Bórili departamenti men «Qazsýshar» RMK-nyń Q.Sátbaev atyndaǵy sý kanaly syndy qalatúzýshi eki kásiporynnan quralady.
Búginde aýdanda qurylys jumystary qarqyndy júrip jatyr. Mysaly sońǵy derekterge saı, aýdanda 300 otbasy baspanamen qamtamasyz etilgen. Táýelsizdik jyldary úsh mektep, eki bala baqsha jáne myńnan astam bala keletin 36 mını-ortalyq salynypty.
Mine, aýdannyń Táýelsizdik jyldaryndaǵy osy jáne basqa da salalarda qol jetkizgen tabystary «Elimniń baqytyn terbetken Táýelsizdik» fılminde keńinen aıtyldy. Bul joba ıdeıasynyń avtory aýdan ákimi Nurken Qobjanovtyń ózi bolǵan eken. Fılm barysynda eki júrgizýshi dóńgelek ústel basynda egemen elimizdiń qalyptasýyna kýá bolǵan aýdan turǵyndary jáne Táýelsizdik qurdastarymen ótkendi eske alǵan, búgingi tynys-tirshilikti sóz etken aýqymdy suhbatty qazaq jáne orys tilderinde júrgizedi.
Suhbatqa qatysqandardyń qatarynda aýdandyq ardagerler keńesiniń tóraǵasy, qurmetti azamat Islam Shákirbekov, aýdannyń qurmetti azamattary Grıgorıı Bodık, Erkinbaı Temirov, memlekettik qyzmettiń ardageri Olga Gerenchır, aýdandyq máslıhattyń hatshysy Qanat Saqqulaqov, sport ardageri Sergeı Potýpalenko, densaýlyq saqtaý ardageri Svetlana Shemerlıýk, densaýlyq saqtaý qzmetkeri Jumash Nurmuhanbetova, «Selskıı trýjennık» gazetiniń tilshisi Elena Vrona, Táýelsizdik qurdasy Áıgerim Súleımenova jáne basqalar boldy.
Budan keıin el Táýelsizdiginiń 30 jylyndaǵy óńirdiń tarıhy men áleýmettik-ekonomıkalyq damýyna arnalǵan «Osakarov aýdany: Táýelsizdik shejiresi» atty kitaptyń tusaýkeseri boldy. Basylymdy tanystyrý qurmetine memlekettik qyzmettiń ardageri Olga Vladımırovna Gerenchır ıe boldy.
Tusaýkeser rásiminde aýdan ákimi bul kitaptyń ólke tarıhyna qurmetpen qaraıtyn jergilikti turǵyndar úshin úlken tartý bolatynyn atap ótti.
– Osakarov aýdany – ár túrli taǵdyr, minez, urpaq ókilderiniń basyn biriktiretin ortaq úıimiz. Bul kitap aýdannyń qalyptasýy jáne onyń damýyna úles qosqan adamdar týraly. Qundy eńbek bizdiń týǵan jerimizde bolyp jatqan oqıǵalar, ekonomıka, mádenıet, bilim, medısına jáne basqa da salalardyń damýy týraly áńgimeleıdi, – dedi ol.
Sahna tórine kóterilip, jergilikti turǵyndardy ulyq merekemen quttyqtaǵan aýdan ákim Nurken Qobjanov derekti fılmniń túsirilimine jáne tarıh, ekonomıka, mádenıet, bilim, medısına jáne basqa da salalarǵa qatysty materıaldar qamtylǵan jańa týyndynyń jaryq kórýine belsene at salysqan azamattarǵa alǵys aıtty. Olardyń bári tórge shaqyrylyp, laıyqty syı-sııapat kórdi.
Merekelik shara barysynda aýdannyń ónerpazdary bı bılep, ánnen shashý shashty. Atap aıtqanda, aýdanda turatyn talantty jastar Osakarov aýdanynyń bolashaqtaǵy gımni ispetti «Sarybel» atty eki birdeı án shyǵarǵan eken, solar sahna tórinen oryndalǵanda jurt oryndarynan kóterilip ketti.
«Sarybel» demekshi, aýdan halqy aldaǵy ýaqytta «Oskarov» ataýynyń dál osyndaı bolyp ózgeretinine bek senimdi eken. Iá, qut qonyp, qydyr daryǵan ólkege óziniń tarıhı ataýy tezirek orlasa eken degen ıgi tilekke biz de shyn yqylaspen nıettestik bildirdik.
