«Konstantın Gorovenko – «Atyraý» fýtbol klýbynyń jańa bas bapkeri. Sondaı-aq, jattyqtyrýshylar quramyna Iýrıı Novıkov – qaqpashylar bapkeri, Denıs Mamonov bas bapkerdiń kómekshisi retinde kirdi. Jaqyn arada biz jańa sport dırektorynyń esimin jarııalaımyz» delingen áleýmettik jelidegi aqparatta.
Konstantın Gorovenkonyń jasy – 44-te. Bapkerlik mansabyn 2010 jyly «Suńqar» fýtbol klýby bas bapkeriniń kómekshisi bolyp bastaǵan. Atalǵan klýbty úsh maýsym jattyqtyrǵan. Budan soń «Qaırat» klýbynyń akademııasyna aýysyp, «Qaırat-1998» komandasynyń bas bapkeri boldy.
Al, 2015 jyly «Qaırat» komandasy bas bapkeriniń kómekshisi retinde tanylǵan. 2017 jyly birinshi lıgadaǵy «Qaırat A» komandasyna jetekshilik etip, alǵashqy maýsymda chempıonattyń qola júldesin ıelengen. 2018 jyldyń qańtarynda «Jetisý-B» komandasynyń bas bapkerligine taǵaıyndalǵan. 2020 jyly «Shahter» komandasyn baptaǵan. 2021 jylǵy maýsymda birinshi lıgada oınaıtyn «Maqtaraldyń» bas bapkeri bolǵan.
Buǵan deıin «Atyraý» fýtbol klýbyna Aram Voskanıan jetekshilik etken edi.
