«Álemde 275 mıllıonnan astam koronavırýs juqtyrý jaǵdaıy tirkelgen. Táýligine 500 myńnan astam jaǵdaı tirkelip, 5,3 mıllıonnan astam adam qaıtys boldy. Dúnıejúzilik densaýlyq saqtaý uıymynyń Eýropalyq bóliginde 54 eldiń 15-de sońǵy aptada syrqattanýshylyqtyń artqany baıqaldy. Sońǵy 14 kúnde Danııada syrqattaný 70 paıyzdan asqan, Italııada, Shvesııada – 50 paıyzdan, Fransııa, Ulybrıtanııada – 40 paıyzdan astam ósken, Novergııa men Portýgalııada – 30 paıyzdan astam ósti», dedi Jandos Búrkitbaev Úkimettiń búgingi otyrysynda.
Onyń aıtýynsha, Qazaqstanda sońǵy aptada syrqattaný 31 paıyzǵa tómendedi. Álemdik reıtıngte Qazaqstan KVI-ge qarsy eki dozamen vaksınalaý boıynsha 208 eldiń ishinde 103-orynda. Onyń ishinde TMD elderi arasynda Qazaqstan ekinshi orynda tur, halyq sanynyń 44,5 paıyzy vaksınamen qamtylǵan.
«Respýblıkada PTR testtiń oń nátıjesimen 984 myńǵa jýyq jaǵdaı jáne teris nátıjesimen 83 myńǵa jýyq jaǵdaı tirkelgen. Naýqastardyń 96 paıyzdan astamy jazylyp shyqty. 18 852 naýqas emdelýdi jalǵastyryp jatyr. Jalpy Qazaqstanda sońǵy 4 aıda syrqattaný 6 ese tómendedi, reprodýktıvti sany – 0,9 jáne tamyz aıymen salystyrǵanda 1,2 ese tómendegeni baıqalady», dedi J. Búrkitbaev.
