Aımaqtar • 23 Jeltoqsan, 2021

Jannurdyń munarasy

55 ret kórsetildi

Táýelsizdik merekesi aıasynda Batys Qazaqstan oblysy Terekti aýdanyndaǵy Aqsýat aýylynda uıaly baılanys júıesi iske qosylyp, aýyl turǵyndary úlken qýanyshqa bólendi.

Adam jaqsylyqqa tez úı­renedi ǵoı. Uıaly baılanys jú­ıesi kúndelikti eń qajet sura­nystyń birine aınaldy. Ási­rese pandemııa kezinde kóp sharýany qashyqtan bitirýge ábden úırenip aldyq. Osyndaı kezde turǵylyqty jerińde uıaly baılanys nashar bolsa, ınternet shaban bolsa, júıkeni júndeı tútedi. Oblys ortalyǵy Oral qalasynyń irgesindegi Aqsýat aýyly – «sham jaryǵy túbine túspeı turǵan» osyndaı aýyl­dyń biri edi.

Bıyl jazda aýyl ákimde­riniń saılaýy boldy. Sol kezde Aqsýat aýylynyń ákimi laýa­zymyna eki úmitker talasty. Saı­laýaldy nasıhat kezin­de eki úmitker de halyqpen kez­desip, baǵdarlamalaryn tanys­tyryp jatty. Sol kezde aq­sýat­tyqtardyń aldymen aıt­qan suraýy – uıaly baılanys bolatyn.

Endi she? Oral qalasynan nebári 25 shaqyrym jerde ornalasqan Aqsýat aýyldyq okrýginde 3 myńǵa jýyq halyq turady. Munda 628 oqýshylyq eki orta mektep, 100-ge jýyq baldyrǵan oqıtyn eki bas­taýysh mektep bar. Mektep ǵı­­­ma­­raty kúrdeli jóndeýden ótken. Tabysty kásipkerler, bel­gili maı zaýyty da osynda. Aýyldyq okrýgte aýyz sý qu­byry, aýasyz elektr je­lisi, gazdandyrý jáne jol qurylysy máseleleri sheshilgen. Kúre jol­dyń boıynda, Jaıyqtyń jaǵasynda turǵan ásem aýyl­dyń bir «kemdigi» – dál osy baılanys-tyn.

Aqsýat aýylyn osy armanǵa jańa ákim Jannur Ahmetov jetkizdi.

– Bıyl saılaý nátıjesi bo­ıyn­sha shilde aıynda Aqsýat aýyldyq okrýginiń ákimi bolyp saılandym. Halyqpen kezdesý barysynda turǵyndar baılanys máselesin birneshe márte kóterdi. Jumysqa kiris­ken kezimde ózim de munyń qan­daı kedergi eke­nin túsindim. Sóıtip, birden baılanysty kú­sheıtý úshin qajetti munara ornatý, qajetti qujattamany resimdeý boıynsha iske kiristim. Árıne, bul jumys halyqtyń tikeleı qoldaýymen jáne je­ke kásipkerlerdiń kó­megimen júzege asty. Táýel­siz­dik mere­kesi qarsańynda saı­laýaldy baǵ­darlamamnyń bir bóligi, halyqtyń amanaty oryn­dalǵanyna qýanyshtymyn, – deıdi aýyl ákimi.

Shyny kerek, bıýdjeti sha­ǵyn, qysqa jipteı kúrmeýge kelmeıtin aýyl úshin bıiktigi 24 metrlik munara turǵyzý ońaı bolǵan joq. Áldebir meke­meniń qoldanylmaı jatqan munarasyn taýyp, kelisip, ony jergilikti kásipkerlerdiń kó­megimen aýylǵa jetkizý úshin jańa ákim zyr jú­girip, biraz ter tógipti. Buǵan deıin Tasqala kentiniń ákimi, Te­rek­ti aýdandyq ishki saıasat bó­liminiń basshysy bolǵan táji­rıbeli azamat úlken-kishi­men tez til tabysyp, bul sharýany aýyl turǵyndarynyń, mese­nat­tardyń kúshimen atqaryp shyq­ty. Sóıtip, bes jyldan beri aqsýattyqtar armandaǵan sapaly baılanys, júırik ınternet qoljetimdi boldy. Qazirdiń ózinde halyq «Jannurdyń mu­­na­rasy» dep atap ketken qon­dyrǵydan baılanys jeli­siniń sapaly mobıldi ın­terneti tarap jatyr.

– Damyǵan zamanda baılanyssyz otyrý óte qıyn. Karan­tındik shekteýlerge baılanys­ty kóp qyzmet onlaın rejimge aýysty. Sabaq, jumys sekildi dúnıeler uıaly telefonǵa baı­landy. Sol kezeńde qatty qı­naldyq. «Sapaly baılanys júıesin qosý kerek» dep aýyl tur­ǵyndarynan qol jına­dym. Tórt júzden astam adam­men kezdesip, qoldaý taptym. Qu­daı­ǵa shúkir, tilegimiz oryn­­daldy. Endi aýylǵa jańa lep, jańa júıe keldi. Qýa­nyshtymyn, – deıdi aýyl tur­ǵyny Álibek Aıtqalıev.

Joǵaryda aıtqandaı, «tas­baqa baılanystyń» taqsiretin eń kóp tartqan muǵalim qaýymy bolatyn. Sondyqtan bul ja­ńa­lyqqa júregi jaryla qýan­ǵandar da ustazdar boldy.

– Bizdiń mektep jumysynyń kóp bóligi búginde jelige baılanysty. Keshegi qatań karantın tusynda aýyldaǵy stý­dent­­terimiz kezekti oqý ses­sııa­­laryn tapsyra almaı qı­naldy. Sondyqtan munara or­na­tyl­ǵanyna bárimiz qýanyp jatyrmyz. Telefon 4G ustap tur! Qaladan 25 shaqyrym jer­degi Aqsýat aýylynyń halqyn tolǵandyrǵan máseleler osylaısha ret-retimen sheshimin taýyp jatyr. Bul mereke al­dyndaǵy keremet tartý boldy, – deıdi Gúlmıra Baqbasova.

Jańa munaranyń iske qo­sylǵanyn aýyl bolyp atap ót­ken aqsýattyqtardyń jıyny toıǵa ulasty. Saltanatty jıynda aýyl ákimi Jannur Bekbaýuly aýyldyń damýyna belsendi qolǵabys etip júrgen birqatar aýyl azamatyn marapattady. Olardyń qatarynda «Kárim» dúkeniniń ıesi R.Álibekuly, aýyl azamattary R.Aqmyrzaev pen Á.Aıtqalıevter de bar.

 

Batys Qazaqstan oblysy

Sońǵy jańalyqtar

Indet qaıta órshidi

Álem • Keshe

О́ńirde damý úrdisi bar

Aımaqtar • Keshe

Tańdaıdyń tarlany

Tarıh • Keshe

Joǵalǵan soldat

Tarıh • Keshe

Dombyrany dáriptedi

Rýhanııat • Keshe

Almatyda 36 gradýs ystyq bolady

Aýa raıy • Keshe

Búgin - Ulttyq dombyra kúni

Qazaqstan • Keshe

Uqsas jańalyqtar