Bul jobaǵa ınvestısııa sheteldik qarjy ınstıtýttarynan bólindi. Naqtyraq aıtar bolsaq, «Azııa damý bankinen» 41 mln dollar mólsherinde qarajat quıyldy. Al jol qurylysyn eki qazaqstandyq fırma jáne Ulybrıtanııanyń «Balfor Bıttı» jáne Túrkııanyń «Mensel» kompanııalary «Afdan» AQ, «Jezqazǵan joldary» AQ-men birigip júrgizdi. Jol salý jumystary úsh jyl qatarynan júrgizilip, 2001 jyly sátimen aıaqtaldy.
Sonymen qatar 2001 jyly Qaraǵandy-Osakarov jol ýchaskesinde merdiger retinde túrik fırmasy «Intes-Isot» jumys júrgizip, halyqaralyq qarjy uıymdary bólgen ınvestısııany ıgilikke jaratty. Sapaly jol 2003 jyly tolyǵymen paıdalanýǵa berildi.
Odan keıingi aıtýly jobanyń biri – Osakarovka-Vıshnevka jol ýchaskesi boldy. Mundaǵy jumystardy otandyq «Jezqazǵan joldary» AQ jáne «JelDorStroı» birikken mekemesi 2021 jyly bastap, 2003 jyly aıaqtady.
Taǵy bir erekshe atap óter joba – Qaraǵandy qalasyndaǵy kishi aınalma jol. Qazir bul 7-shi magıstral dep atalady. Uzyndyǵy 34 shaqyrymdy quraıdy. Bul ýchaskeniń qurylysy 2002-2003 jyldary júrgizildi. Joba jumystarynyń 17 shaqyrymyn «Qaraǵandy joldary», qalǵanyn «Jezqazǵan joldary» fırmalary atqardy. Aıta ketý kerek, bul joldyń salynýy oblys ortalyǵy úshin asa mańyzdy boldy. Sebebi odan buryn Qaraǵandy-Almaty kúre jolymen júrgen avtokólikter legi qalany qaq jaryp ótetin. Endi olar qala ishinde keptelisti azaıtyp, aýasyn lastamaı, syrtpen aınalyp óte bastady.
Osy oraıda, uzyndyǵy 88 shaqyrymdy quraıtyn Almaty-Gúlshat jol bóligindegi Gúlshat-Saryshaǵan ýchaskesiniń qurylysyn da tilge tıek ete ketýge bolady. Bul jumystardy halyqaralyq qarjy ınstıtýttarynyń aqshasyna «Irdo» kompanııasy júrgizdi. 2001 jyly bastalǵan jumys 2003 jyly máresine jetken bolatyn.
Sonymen birge Aqsý-Aıýly-Qaraǵandy, Aqsý-Aıýly-Aqshataý jol ýchaskeleriniń salynýy da oblys ekonomıkasy úshin mańyzdy ról oınady.
Jalpy, Qaraǵandy oblysynda aýyldar arasyndaǵy joldardy qosqanda, barlyǵy 12 440 shaqyrymǵa sozylatyn jol bar eken. Onyń 2 785 shaqyrymy respýblıkalyq mańyzdaǵy jolǵa jatady. Osy oraıda «Jol aktıvteriniń ulttyq sapa ortalyǵy» RMK Qaraǵandy oblystyq fılıalynyń dırektory Aıbol Bıdaıbekov mynadaı mysal keltiredi. «Bizdiń elimizde joldyń 1 myń sharshy kılometrge ornalasýy 35,6 shaqyrym eken. Al bul kórsetkish Reseıde 44 shaqyrymǵa teń keletin kórinedi. AQSh-ta tipti joǵary – 1 myń sharshy kılometrge ornalasýy 670 shaqyrymnan keledi. Iаǵnı bizge bul baǵyttaǵy jumystardyń aýqymyn arttyra túsý kerek. О́ıtkeni bizdiń jerimiz keń, eldi mekenderimiz bir-birinen alshaq ornalasqan. Al aýdandar, aýyldardyń arasyn jalǵaıtyn joldar tym az», deıdi ol.
Iá, bul sózdiń jany bar. Jańa jol salý bylaı tursyn, qazir oblystyq mańyzdaǵy biraz joldar sapasynyń syn kótermeıtini de shyndyq. Degenmen Qaraǵandy oblysy boıynsha jol qurylysy salasynda serpilis bar. Qazirgi tańda oblystyń qalalarynda, aýdan ortalyqtarynda, tipti aýyldyq eldi mekenderde múmkindiginshe joldar salynyp, jóndelip jatyr. Mysaly, byltyrdan bastap Maıqudyq eldi mekeninde uzyndyǵy 10,5 shaqyrymnan asatyn kúre jol túbegeıli jańǵyrtyldy. Sondaı-aq Jezqazǵan, Sátbaev, Balqash, Temirtaý qalalarynda sala boıynsha iri jobalar júzege asty.
Qaraǵandy oblysy
