Shý qalasynyń aınalma ýchaskesinde 7 kópir men jol ótpeleriniń, sonyń ishinde uzyndyǵy 204 metr bolatyn Shý ózeni arqyly ótetin eń úlken kópirdiń qurylysy boıynsha jumystar belgilengen merzimnen buryn aıaqtaldy. Jobalyq quny – 15 mlrd.teńge.
Atalǵan ýchaskede qozǵalystyń ashylýy tranzıttik kóliktiń kedergisiz ótýin qamtamasyz etedi jáne Shý qalasyn Moıynqum, Birlik, Aıdarly, Báıdibek sııaqty jaqyn mańdaǵy eldimekendermen baılanystyrady.
«QazAvtoJol» UK» AQ Jambyl oblysy boıynsha fılıalynyń dırektory Aıjan Týǵanovanyń aıtýynsha, uzyndyǵy 62 shaqyrym bolatyn «Shý-Hantaý» ýchaskesindegi jumystar tolyǵymen aıaqtalǵan. Nysan josparlanǵan merzimnen alty aı buryn paıdalanýǵa berildi.
«Merki-Shý» jáne «Hantaý-Býrylbaıtal» ýchaskeleri boıynsha bir baǵytta qozǵalys ashyldy, 4 kópirge kireberiste jumystar júrgizilýde. Jumystardyń tolyq aıaqtalýy 2022 jylǵy qarashaǵa josparlanǵan.
Aýqymdy joba aıasynda 6 kópir, temir jol arqyly 3 jol ótpesi, jaryqtandyrylatyn 11 kólik aıryǵy, 9 jaılastyrylǵan demalys alańy men 34 kólik pavılony salynbaq.
«Qurylys jumystaryna 800-den astam qyzmetker men 400-den astam tehnıka birligi jumyldyrylǵan», dep jetkizdi A.Týǵanova.
Úkimet basshysynyń qoldaýynyń arqasynda kelesi jyly «Shý-Blagoveshenka» avtomobıl jolyna kúrdeli jóndeý júrgizý úshin qarajat bólinetin bolady.
Atalǵan jobalardy aıaqtaý Qazaqstannyń soltústigi men ońtústigi aralyǵyndaǵy, sondaı-aq, Qyrǵyzstan Respýblıkasymen tranzıttik áleýetti edáýir arttyrýdy qamtamasyz etedi.
