Joba Ulttyq qaýipsizdik komıteti Shekara qyzmetiniń Áskerı-patrıottyq qyzmet basqarmasy bastamasy negizinde «Balapan» telearnasymen birlesip júzege asyrylǵan.
«Shekarashy balaqaı» – Qazaqstandaǵy áskerı taqyryptaǵy debıýttik anımasııalyq joba. Mýlthıkaıa jas urpaqtyń boıynda otansúıgishtik rýhty qalyptastyrý, memlekettik shekarany qorǵaýdyń mańyzyn túsindirý jáne áskerı qyzmetke degen qurmetti arttyrýdy kózdeıdi.
Is-shara barysynda UQK Shekara qyzmeti dırektorynyń orynbasary, general-maıor Tóleýjan Júnisov jobanyń mańyzdylyǵyna toqtalyp, áskerı-patrıottyq tárbıeniń jas urpaq úshin erekshe ról atqaratynyn atap ótti. Onyń aıtýynsha, búginde Shekara qyzmeti júıesinde 380 áskerı-patrıottyq klýb qarqyndy jumys isteıdi. Onda 5 700-den astam tárbıelenýshi bilim alyp jatyr.
«Shekarashy balaqaı» sııaqty jobanyń dúnıege kelýi biz úshin úlken qýanysh. Bul – tek mýlthıkaıa ǵana emes, balalarǵa túsinikti tilde Otanǵa qyzmet etý, shekara kúzetshileriniń eńbegin qurmetteý jáne el aldyndaǵy jaýapkershilikti seziný qundylyqtaryn jetkizetin zamanaýı qural. Shekara qyzmeti úshin áskerı-patrıottyq tárbıe árqashan erekshe nazarda, jáne biz bul baǵyttyń jańa, qoljetimdi ári áserli formatta damyp jatqanyna qýanyshtymyz», dedi Shekara qyzmeti dırektorynyń orynbasary.
Is-shara barysynda qonaqtar mýlthıkaıany tamashalap, jobanyń bastamashylary jáne ony júzege asyrǵan shyǵarmashylyq top ókilderimen kezdesti.
Atalǵan is-sharaǵa áskerı-patrıottyq klýbtardyń tárbıelenýshileri, oqýshylar, sondaı-aq memlekettik organdar men respýblıkalyq BAQ ókilderi qatysty. Qatysýshylar mundaı jobalardyń jas urpaqtyń patrıottyq tárbıesindegi mańyzy zor ekenin atap ótti.
