Búgin elordadaǵy Ulttyq akademııalyq kitaphanada ótken «Shyǵystyń shoqjuldyzdary» atty halyqaralyq konferensııada Nızamıdiń qazaq tiline, Naýaıdiń qazaq jáne ázerbaıjan tilderine, sondaı-aq Iýnýs Emreniń qazaq tiline aýdarylyp, basylǵan eńbekteriniń tanystyrylymy ótti.
«Túrki álemi jahan jurtynyń nazaryn ózine aýdardy. Jańa zamanda da biz osy bıikke kóterilýdi maqsat tutýymyz kerek. Ol úshin túrki jurtynyń tutastyǵyn kózdeıtin búgingideı eńbekterdiń mańyzy zor. Sebebi, álem túrki jurtynyń rýhanı áleýetin uly tulǵalarymyz ben olardyń ómirsheń týyndylary arqyly tanıdy. Sondyqtan shaıyrlardyń túrki halyqtarynyń altyn dińgegi sanalatyn murasyn jaryqqa shyǵarý, aýdarý, zertteý - bizderge mindet», dep jazdy Máýlen Áshimbaev óziniń Facebook paraqshasynda.
Osy rette Senat tóraǵasy qazaqtyń kórnekti aqyndary Nesipbek Aıtulyna, Svetqalı Nurjanǵa, ǵalym Tóráli Qydyrǵa alǵysyn bildirdi.
Ol, sondaı-aq Halyqaralyq Túrki akademııasynyń qajyrly eńbegin erekshe atap ótti.
«Osy mindettiń údesinen shyǵa bilgen Darhan Qydyráli bastaǵan Halyqaralyq Túrki akademııasynyń ujymyna alǵys aıtamyz. Aldaǵy ýaqytta da bul baǵyttaǵy jumystaryńyz tabysty bolsyn. Baýyrlas elderdiń yntymaǵy nyǵaıa bersin», dep jazdy ol.
