Nur-Sultanda 189 qazaqstandyq Elbasy medaldarymen marapattaldy, onyń ishinde 180 qola jáne 9 kúmis medal. Al Shymkent shaharynda 214 qatysýshy qola medalǵa ıe boldy.
Is-sharalarǵa Elbasynyń medal ıegerleri, elimizdiń belgili memleket jáne qoǵam qaıratkerleri, memlekettik organdardyń ókilderi, ǵalymdar men belsendi jastar qatysty.
«Elbasy medali» - jastardy keshendi damytýǵa baǵyttalǵan ulttyq deńgeıdegi jalǵyz baǵdarlama. Qatysýshylar «altyn», «kúmis» nemese «qola» medaldarmen marapattalady.
Baǵdarlamaǵa 14-29 jas aralyǵyndaǵy jas qazaqstandyqtar qatysady.
Uıymdastyrýshylardyń aıtýynsha, bul baǵdarlama óskeleń urpaq úshin alǵa qoıǵan maqsattaryna jetýge úlken serpin beredi. Qazirgi ýaqytta «Elbasy medali» baǵdarlamasyna 20 000-nan astam adam qatysady. Onyń 83%-y - mektep oqýshylary, 11%-y-stýdentter, 6%-y-jumys isteıtin jastar, 24%-y - aýyldyq jerlerden kelgen qatysýshylar.
2019 jyldan bastap medaldardy 6 186 qazaqstandyq aldy, 605 Elbasy medaliniń ıegerlerine memlekettik bilim berý granttary taǵaıyndaldy, olardyń 30%-dan astamy aýyl mektepteriniń túlekteri.
Elbasynyń qola medaliniń ıegerleriniń biri - Nur-Sultan qalasynyń №91 mektep-gımnazııasynyń 9 synyp oqýshysy Dıana Myrzaǵalıeva.
«Jobaǵa qatysý arqyly meniń ómirim 180 gradýsqa ózgerdi. Joba meniń erik-jigerimdi qalyptastyrdy, men jan-jaqty damı bastadym, kóptegen kitaptar oqyp, jańa deńgeıge kóterildim. Ekologııa máselelerin kóteretin «Aqsý-Jabaǵyly sıqyrly álemi» ertegisin jazdym, múmkindigi shekteýli balalardy qoldaý jónindegi is-sharalardyń úılestirýshisi atandym. Sondaı-aq halyqaralyq baıqaýǵa qatysyp, «Jyl volonteri» men «Volonterlikti damytýǵa qosqan kórnekti úles» nomınasııalary boıynsha jeńimpaz atandym», dedi Dıana Myrzaǵalıeva.
Eske sala ketsek, 15 jeltoqsanda elordada «Elbasy medali» baǵdarlamasyna qatysýshylardy marapattaý jónindegi komıssııanyń otyrysy ótti. Komıssııa baǵdarlamany iske asyrý nátıjelerin qarap, baǵdarlamany tabysty aıaqtaǵan 2 259 adamdy marapattaýǵa usyndy. Olardyń ishinde 2 216 qola, 40 kúmis jáne 3 altyn qatysýshy bar. Sondaı-aq baǵdarlamany aıaqtaǵan 344 qatysýshy sertıfıkattarǵa ıe bolady.
