Atalǵan málimetti QR Bilim jáne ǵylym mınıstrliginiń baspasóz qyzmeti rastap otyr.
«Búginde oqýshylardyń úıirme, sport seksııasyna jazylýy memlekettik qyzmet retinde júzege asyrylady. Iаǵnı oqýshy memlekettik qyzmetter portaly arqyly qalaǵan úıirme nemese sporttyq seksııaǵa jazyla alady.
Atalǵan sharany basqasha aıtqanda oqýshylarǵa qosymsha bilim berý deýge bolady. Qosymsha bilim berý boıynsha oqýshylardy qabyldaý QR Bilim jáne ǵylym mınıstriniń 2020 jylǵy 22 mamyrdaǵy №219 buıryǵyna sáıkes júzege asyrylady. Osylaısha atalǵan buıryqqa súıene otyryp jergilikti atqarýshy organdar jyl saıyn bekitilgen bıýdjet qarajat kóleminde memlekettik tapsyrysty oryndaıdy», delingen atalǵan vedomstvonyń baspasóz qyzmeti usynǵan habarlamada.
Mınıstrlik usynǵan aqparatqa súıensek, qosymsha bilimmen qamtylǵan oqýshylardyń 80,7%-y úıirmeler men sporttyq seksııalarǵa tegin qatysyp jatyr.
«Bıyl memlekettik bilim berý tapsyrysy aıasynda 33 737-den astam mektep oqýshysy úıirme jáne seksııasymen qamtyldy. Bul maqsatqa qarajat jergilikti bıýdjetten bólinedi. Búginde qosymsha bilim berý kontıngentiniń 80,7%-y úıirmeler men sporttyq seksııalarǵa tegin barady. Ol degenimiz shamamen 803 027 bala. Aýyldaǵy oqýshylarda nazardan tys qalǵan emes, qazir aýyldyq jerlerde 2 942 seksııa jumys istep tur. Joǵary atalǵan 800 myńnan astam oqýshynyń ishinde 468 401 bala qosymsha bilimdi mınıstrlikke baǵanysty uıymdardan alyp jatyr, al qalǵany memlekettik tapsyrys aıasynda jeke uıymdardan bilimin sýsyndatýda», delindi mınıstrlikten.
