Qazan, qarasha jáne jeltoqsan aralyǵynda elorda turǵyndaryna tegin jattyǵý úshin sporttyń 11 túri usynyldy. Jobaǵa joǵary sanatty jattyqtyrýshylar, sport sheberleri, bilikti nusqaýshylar qatysty.
«Prezıdentimiz Qasym-Jomart Toqaev óz Joldaýynda aıtyp ketkendeı buqaralyq sportty damytý maqsatynda Nur-Sultan qalasy ákimdiginiń qoldaýymen jáne Dene shynyqtyrý jáne sport basqarmasynyń bastamasymen «Qoljetimdi sport» jobasy qolǵa alynǵan bolatyn. Qazan, qarasha, jeltoqsan aılarynda Nur-Sultan qalasynyń barlyq saıabaqtarynda, sonymen qatar qysqy ýaqytta qalanyń 40 aýmaǵynda 5000-nan astam adam «Qoljetimdi sport» jobasy aıasynda sporttyń 11 túrimen aınalysty. Búgingi skandınavııalyq júgiriske 200-ge jýyq jas jáne ardager sportshy qatysyp jatyr», dedi qaladyq Sporttyq-buqaralyq is-sharalardy ótkizý dıreksııasy basshysynyń orynbasary Erjigit О́serbaı.
Sabaqtar qazan aıy boıy elordanyń saıabaqtary men alańdarynda júrgizilip, kún sýyta bastaǵan soń barlyq sabaqtar elordanyń jattyǵý ortalyqtaryna aýystyryldy. Kez kelgen qala turǵyny aptasyna 3 ret jattyǵa alýǵa múmkindik aldy. Jattyǵýlar aýla klýbtarynda, sport ortalyqtarynda jáne sport saraılarynda, sonyń ishinde «QAZAQSTAN» jeńil atletıka arenasynda, «Táýelsizdik» saraıynda jáne «Alaý» muz aıdynynda ótti.
Joba elorda turǵyndary arasynda tanymal boldy. Jobaǵa 3 aıda 20 myńnan astam turǵyn qamtyldy. Nur-Sultan qalasy ákimdiginiń qoldaýynyń arqasynda elorda turǵyndary úshin barlyq sabaqtar tegin ótkizildi.
«Men zeınetkermin. Osy skandınavııalyq júriske qatysyp jatqanyma úsh aı boldy. Qalalyq ákimdikke, ózimizdiń trener Gúlzıpa Qumyraǵazyqyzyna úlken alǵys aıtamyz. Bizge taıaqshany tegin berdi. Kún saıyn jattyqtyrady. Bul - densaýlyqqa óte paıdaly. Qan aınalymyna jaqsy áser etedi. Alǵysymyz sheksiz!», dedi qala turǵyny Esgúl Qalıeva.
Esterińizge sala keteıik, Memleket basshysynyń Qazaqstan halqyna Joldaýynda bergen tapsyrmalaryn júzege asyrýǵa sáıkes, elordada «Qoljetimdi sport» jobasy iske qosylyp, onyń aıasynda elorda turǵyndary sporttyń 11 túri boıynsha ashyq aýada, jabyq alańdarda jattyǵýlarǵa qatysqan bolatyn. Barlyq derlik sabaqtar bilikti jattyqtyrýshylarmen tegin ótkizildi.
Atalǵan joba 2022 jyly da óz jumysyn jalǵastyrady dep josparlanyp otyr.
