Shymkenttegi Soltústik saıajaı móltek aýdanynda ornalasqan úıde barlyq jaǵdaı jasalǵan. Tabıǵı gaz qosylyp, aýyz sý júıesi tartylǵan. Qoǵamdyq kólikte dál úıdiń irgesinen júrip jatyr.
«Qurmet Talapqazy «Qurmet» gramotasyna laıyq edi» degen áleýmettik jelide pikir kóbeıip ketti. Kópshilik «Halyq bolyp baspana syılaıyq» degen oılardy da aıtty. Tipti ol pikirlerge meni belgilep jazyp jatty. Sondyqtan táýekel etip bastap kettik. Eki kúnde 9 mln teńgeden astam qarajat jınaldy.
Belgili mesenat Dýlat Tastekeev «qansha jınaısyńdar sonsha qarajat qosyp beremin» degen ýádesi bar edi. Jalpy 19 mln-daı qarajatqa úı aldyq», dedi jýrnalıst Maqsat Tolyqbaı.
Búgin Qurmet jańa úıinde qurbandyq shalyp, quran oqytty. Jańa jyldan keıin Shymkenttegi oqýynda tegin jalǵastyrady. Endigi maqsaty - Altaıdyń ar jaǵyndaǵy áke-sheshesi men baýyrlaryn elge kóshirip alyp kelý.
«Halyqqa rahmetimdi aıtamyn. Jınalǵan aqshany qaıyrymdylyqqa jumsamaqshy edim, qarajatty qolyma bermeı, úı alyp berdi. Igi iske uıytqy bolǵan Maqsat Tolyqbaı, Dýlat Tastekeev aǵama jáne barsha halyqqa rahmetimdi aıtamyn. Aldaǵy ýaqytta otbasymdy alyp kelip, mal sharýashylyǵymen jáne saýdamen aınalyssam degen oıym bar» deıdi Qurmet.
Eske salsaq, Shymkent qalasynyń 25 jastaǵy turǵyny Qurmet Talapqazy elimizdiń batysyndaǵy qýańshylyqqa tap bolǵan maldy aýyldarǵa jem-shóp jiberý úshin búkil jumysyn tastap, qoǵamdyq bastamaǵa muryndyq bolǵan edi.
