Qorǵaljyn óńiri ejelden tabıǵı baılyǵymen erekshelenetin aımaq. Aýdandaǵy on san kóldiń balyǵy taıdaı týlap jatyr. Tutynýshy da irgede. Tek kóńilge qonymsyzdyǵy, ıen yrystyń uqsatylmaýynda edi. Abaı aýylyndaǵy jańadan salynǵan balyq óńdeý sehy osy olqylyqtyń ornyn toltyrady degen úmit bar.
– Biz uzaq merzimge jalǵa alǵan sý aıdynynda shortan, taban, kókjon, alabuǵa tárizdi balyqtyń birneshe túri óristeıdi. Qazir sý quramyn zerthanadan ótkizýdemiz. Nátıjesine oraı basqa balyqtardyń da tuqymyn satyp alyp, balyq túrin baıytýǵa nıettenip otyrmyz, – deıdi kásipker Ersaıyn Hasenov, – aýlanǵan balyqty óńdep, tutynýshyǵa jetkizsek, elge de, ózimizge de paıdaly bolar edi.
Aýmaǵy elý gektarǵa jýyq sý aıdynynyń ortasha tereńdigi 12 metrge taıaý. Kásipker erejege sáıkes jaǵalaýdy tazartyp, bitelip qalǵan tabıǵı sý kózderin, qar-jańbyr sýy aǵatyn jylǵalardy arshyp, qystyń kúni muzyn oıyp tynymsyz eńbek etýde. Balyq túri kóbeıgen soń aýyldaǵy aǵaıyn da qarmaqpen aýlap, qyzyǵyn kórmek.
Jańa sehty salýǵa 50 mln teńge qarajat jumsalǵan. Onyń 20 mln teńgesi óz qarjysy bolsa, 30 mln teńgeni alty jylǵa nesıege alypty. Qazir tórt adam turaqty jumyspen qamtylyp otyr.
– Buryn oıda bar kásip bolǵanymen, bul tarapta tájirıbemiz joq edi, – deıdi kásipker. – Qytaıdyń iskerlerinen úırendik. Balyqty súıeginen arshyp, etinen birneshe túrli jartylaı fabrıkattar daıyndaımyz. О́zimizdiń ósirgen balyǵymyzǵa qosa, aýdandaǵy osy baǵytta jumys isteıtin kásipkerlerdiń balyǵyn da óńdep beremiz. Osylaısha, biraz jurtqa jeńsik balyq eti tutynýshyǵa sapaly daıyndalyp jetkiziledi.
Kóldi jalǵa berý tabıǵatty saqtap qalýdyń bir amaly. Oblysta osy oraıda birqatar sharýanyń basy qaıyrylyp jatyr.
– Aldaǵy ýaqytta da ıesi joq sý kózderin qoldanystaǵy zańǵa oraı jalǵa beretin bolamyz, – deıdi «Esil» oblysaralyq basseındik balyq sharýashylyǵy ınspeksııasynyń basshysy Nyǵmet Qaýashev, – bul talpynys shaǵyn jáne orta bıznesti damytýǵa yqpal etse, ekinshi jaǵynan azyq-túlik molshylyǵyn jasaýǵa septesedi.
Nesi bar, jomart tabıǵattyń ólsheýsiz syıyn uqsata alsaq, qanekeı!..
Aqmola oblysy,
Qorǵaljyn aýdany
