AQSh-tyń Florıda shtatynyń Plant-Sıtı qalasynda uıymdastyrylatyn boks keshinde qazaqstandyq bylǵary qolǵap sheberi Qanat Islam ulybrıtanııalyq Djımmı Kellıge qarsy sharshy alańǵa kóteriletin boldy. Kellı sharshy alańǵa 27 márte shyǵyp, 25 kezdesýde qarsylastarynan aılasyn asyrsa, eki kezdesýde ese jibergen.
Jalpy Djımmı Kellıdi boksshylardyń tilimen aıtqanda «qatardaǵy qapshyq» deýge ábden bolady. Ras, rekordy bir qaraǵanda jaman emes. Alaıda ol 27 kezdesýiniń úsheýinde eki juldyzdy boksshymen qolǵap túıistirse, bir márte úsh juldyzdy boksshyǵa qarsy sharshy alańǵa kóterilgen.
Kásipqoı boksta eń myqty qarsylasty boxrec.com saıty bes juldyzben baǵalaıdy. Sonymen Qanat Islamnyń bolashaq qarsylasy otrańqol boksshylardan kimdermen kezdesti? Iá, onyń kásibı mansabyndaǵy eń myqty qarsylasy – ulybrıtanııalyq Lıam Smıt. Alaıda Djımmı aty atalǵan boksshydan tehnıkalyq nokaýtpen utylǵan. Odan bólek Djımmı eki juldyzdy úsh boksshymen qolǵap túıistirgenin aıttyq qoı. Olarǵa qarsy statıstıkasy qandaı?
Djımmı Denıs Hoganǵa qarsy jekpe-jekte de túk mandytqan joq. Qarsylasyna tóreshilerdiń birjaqty sheshimimen ese jiberdi. О́zimizdi qınap otyryp Djımmdiń tórt «myqty qarsylaspen» shyqqanyn zerdeledik. Olardyń ózi qatardaǵy boksshylar. Statıstıka 2:2. Iаǵnı, eki jeńis jáne eki jeńilis. Al Djımmıdiń ózine tanymal saıt tarapynan berilgen baǵa – bir jarym juldyz.
Kásipqoı boksshy retinde kásibı mansabyn aıaqtaıtyn jasqa jaqyndap qalǵan otandasymyzǵa mundaı qarsylaspen judyryqtasý ne úshin kerek? Biz túsinbedik. Biraq «qapshyq qarsylastardy» birinen soń birin jeńip rekordty jaqsartý abyroı ápermeıtinin Qanattyń ózi áıteýir bir túsinetin shyǵar...
