Mınıstr qala polısııasynyń birqatar nysandaryn aralap, Memleket basshysynyń azamattardyń polısııaǵa qoljetimdiligin barynsha jeńildetýge baǵyttalǵan polısııa jumysynyń servıstik modelin jáne «Qadamdyq qoljetimdiliktegi polısııa» qaǵıdatyn engizý jónindegi tapsyrmalarynyń oryndalý barysymen tanysty.
«Qadamdyq qoljetimdiliktegi polısııa» qaǵıdatyn iske asyrýdaǵy sheshimderdiń biri - modýldik úlgidegi stasıonarlyq beketterdi ornatyp, ýchaskelik polısııa pýnktteriniń sanyn ulǵaıtý.
Ýchaskelik polısııa pýnktin aralaý kezinde ýchaskelik polısııa ınspektorlary qyzmetiniń sapasyn jaqsartý, ýchaskelik pýnktter, mobıldi beketter jelisin ońtaıly ornalastyrý jáne keńeıtý, azamattardyń saýalyna den qoıý jedeldigin arttyrý jónindegi sharalar qaraldy.
Bıyl elordada 10 ýchaskelik pýnkt pen azamattardyń suraýlaryna polısııanyń ýaqtyly jáne sapaly áreket etýin qamtamasyz etetin 10 modýldik polısııa beketi iske qosyldy. Jyl saıyn elordalyq polısııanyń materıaldyq-tehnıkalyq bazasy jaqsaryp keledi. Qoldanysta quqyqtyq tártipti qorǵaýǵa jáne qylmysqa qarsy kúreske arnalǵan zamanaýı tehnıka men qyzmettik avtokólik bar.
Sonymen qatar, qala ákimdiginiń qoldaýymen Polısııa departamenti úshin 42 avtokólik pen 57 birlik kompıýterlik tehnıka satyp alyndy. Munyń barlyǵy azamattardyń ótinishterine jedel den qoıý, ishki ister organdarynyń ashyqtyǵy men qoljetimdiligi úshin jasalýda. Atalǵan sharalar elorda turǵyndary men polıseıler arasynda tyǵyz qarym-qatynas ornatýǵa, usaq quqyq buzýshylyqtardyń aldyn alýǵa jáne asa aýyr qylmystardy boldyrmaýǵa múmkindik beredi.
Memleket basshysynyń tapsyrmalaryn iske asyrý maqsatynda «Halyq únine qulaq asatyn memleket» tujyrymdamasy aıasynda quqyqtyq tártipti qamtamasyz etý salasyna sıfrlyq sheshimder belsendi engizilýde. Halyqpen tikeleı baılanysta bolatyn syrtqy qyzmettiń barlyq qyzmetkerleri planshetter men beınetirkegishtermen qamtamasyz etilgen. Qala kóshelerinde arnaıy qurylǵylar ornatylady, olar zańǵa qaıshy áreketter nemese tótenshe jaǵdaılar týyndaǵan kezde dabyl sıgnalyn berýge jáne polısııaǵa shuǵyl qońyraý shalýǵa arnalǵan.
Qazirgi ýaqytta azamattar kóp jınalatyn jerlerde azamattardyń polısııaǵa qashyqtan júginýi úshin 13 «dabyl batyrmasy» ornatylǵan. Qurylǵylar iske qosylǵannan beri 700-ge jýyq sıgnal kelip tústi. Negizinen adamdar keńes alýǵa, qujattar joǵalǵan kezde, habar-osharsyz joǵalǵan adamdy izdeýge, telefon urlyǵy, páter urlyǵy, dene jaraqatyn salý jáne basqa da jaǵdaılarda júgindi.
«Bizdiń basty mindetimiz – azamattardyń qaýipsizdigi. Sondyqtan biz ýchaskelik ınspektordyń – polısııanyń ulttyq servıstik modeliniń basty fıgýrasynyń tıimdi jumys isteýi, «Qadamdyq qoljetimdiliktegi polısııa» qaǵıdatyn qamtamasyz etý jáne qajet bolǵan jerde tártip saqshylarynyń turaqty túrde bolýy úshin barlyq jaǵdaıdy jasaýdy jalǵastyramyz», dedi IIM basshysy.
