Aqordada Memleket basshysynyń tóraǵalyǵymen Qaýipsizdik Keńesiniń otyrysy ótti.
Jıynda elimizdiń turaqtylyǵyn shaıqaltpaq bolǵan terrorıstik jáne qylmystyq árekettermen kúres máseleleri talqylandy. Is-sharaǵa Parlamenttiń qos palatasynyń basshylary, Premer-Mınıstrdiń mindetin atqarýshy, Prezıdent Ákimshiliginiń basshysy, Memlekettik hatshy, UQK tóraǵasy, Premer-Mınıstrdiń orynbasary - Syrtqy ister mınıstriniń, Qorǵanys jáne Ishki ister mınıstrleriniń mindetterin atqarýshylar qatysty. Qaýipsizdik Keńesiniń Tóraǵasy qalyptasqan jaǵdaıdyń qıyndyǵyn atap ótip, birqatar jedel shara qabyldaý qajet ekenin aıtty. Sonymen qatar Qazaqstanǵa naǵyz terrorısterdi aıdap salǵan kúshterdi atady.
«Osyǵan baılanysty biz olarǵa toıtarys berý úshin terrorısterge qarsy operasııa júrgizýimiz qajet. Men terrorısterge qarsy shtabty basqaramyn. Buzaqylar jasaǵan terrorıstik aktiniń uıymdastyrýshylary – naǵyz terrorıster. Olardyń qazirgi ýaqytta Almaty men basqa da qalalardaǵy istep jatqan júgensizdigi bizge belgili.
Infraqurylymdardy, eń bastysy, qarý-jaraq saqtalǵan qoımalardy basyp alýda. Ýchılıshe kýrsanttarymen urys júrgizip jatyr. Qazirgi ýaqytta Almatynyń túbinde Qorǵanys mınıstrliginiń áýe-desant bólimsheleri urys júrgizýde», dedi Prezıdent.
Prezıdent atalǵan terrorıstik toptardyń, shyn máninde, shetelde úlken daıyndyqtan ótken halyqaralyq terrorıster ekenin jáne olardyń Qazaqstanǵa jasaǵan shabýylyn basqynshylyq akti retinde qarastyrý qajet ekenin aıtty.
«Osyǵan baılanysty Qaýipsizdik alqasy jónindegi Shartqa súıene otyryp, men UQShU memleketteriniń basshylaryna osy terrorıstik qaýipti eńserý úshin Qazaqstanǵa kómek kórsetýdi suradym. Shyn máninde, bul – qaýip qana eme, bul – memlekettiń tutastyǵyna nuqsan keltirý, azamattarymyzǵa shabýyl jasaý. Olar menen, Memleket basshysy retinde tez arada ózderin qorǵaýdy suraıdy. Azamattarymyzdyń ıgiligin, qaýipsizdigi men tynyshtyǵyn oılaý – meniń Konstıtýsııalyq mindetim. Sondyqtan UQShU-daǵy áriptesterime bildirilgen ótinish – ýaqytyly ári tolyǵymen durys qabyldanǵan sheshim. Qazaqstan halqy bul sheshimdi qoldaıtynyna senimdimin. Jumylsaq, sózsiz, jeńemiz. Terrorıstik toptar iri ınfraqurylymdyq obektilerge shabýyl jasaýda.
Atap aıtqanda, Almaty áýejaıy, bes ushaq, onyń ishinde sheteldik te ushaqtar basyp alyndy. О́kinishke qaraı, Almaty qalasyna shabýyl jasalyp, qıratýǵa jáne vandalızmge jol berildi. Qala turǵyndary terrorıster men qaraqshylar shabýylynyń qurbanyna aınaldy. Sondyqtan bizdiń, onyń ishinde osynda qatysyp otyrǵan Qazaqstan Respýblıkasy Qaýipsizdik Keńesi músheleriniń mindeti – elimizdi syrtqy qaýipten qorǵaý úshin barlyq qajetti ári múmkin bolǵan sharalardy qabyldaý», dedi Qasym-Jomart Toqaev.
Qaýipsizdik Keńesiniń Tóraǵasy óz sózinde terrorısterdiń agressııasyna ushyraǵan el azamattaryna úndeý jasady.
«Qazaqstan Respýblıkasynyń Prezıdenti retinde sizderdiń ómirlerińizdi qorǵaý úshin barymdy salamyn. Birge jeńiske jetemiz dep oılaımyn. Bul — el tarıhyndaǵy kúrdeli kezeń. Bul qalaı, nege boldy degen suraqtardyń jaýabyn anyqtaýǵa týra keledi. Biraq bastysy, elimizdi, azamattarymyzdy qorǵaý», dep túıindedi Memleket basshysy.
