Bir táýlikte tirkelgen indet juqtyrý jaǵdaıynyń 70%-ǵa jýyǵy elordada anyqtalǵan. Naqtyraq aıtsaq, 9 qańtarda elordada 1 442 adamnyń koronavırýs juqtyrǵany anyqtalsa, odan keıin Shymkent qalasynda 123 jaǵdaı tirkelgen. Qalǵan óńirlerde tirkelgen jaǵdaı 100-ge jetpeıdi. Bul Nur-Sultan qalasyndaǵy epıdemııalyq ahýaldyń tym kúrdeli bolyp turǵanyn kórsetedi.
10 qańtardaǵy epıdemııalyq ahýaldy baǵalaý matrısasy boıynsha «qyzyl aımaqta» tek elorda tur. Al «sary aımaqtaǵy» Almaty, Shymkent qalalaryna endi Atyraý oblysy qosyldy. Qalǵan óńirler – «jasyl aımaqta».
Búginde elimizde 22 064 adam koronavırýs ınfeksııasynan emdelip jatyr. Onyń ishinde 3 001 pasıent stasıonarda, 19 063 naýqas ambýlatorııalyq deńgeıde em qabyldaýda. Indetke shaldyqqandardyń arasynda 186 adamnyń jaǵdaıy aýyr, 57 pasıenttiń jaǵdaıy óte aýyr, 38 naýqas О́JJ apparatynda jatyr.
Covid-19 taralýyna jol bermeý jónindegi VAK elordada «Omıkron» shtamynyń taralýyna baılanysty qaladaǵy epıdemııalyq ahýal kúrt nasharlap ketkenin, ótken eki aptada indettiń kúnine 80 jaǵdaıy tirkelse, keıingi bes kúnde aýrýshańdyq deńgeıi 5,5 esege artyp otyrǵanyn habarlady.
«Búginde qalada jańa jaǵdaılardy tirkeý sany 1 442-ge jetti. Qańtardyń alǵashqy 10 kúninde barlyǵy 4 622 jaǵdaı tirkeldi, bul ótken jeltoqsan aıynyń barlyq kórsetkishinen 1,7 esege artyq ekenin kórsetip tur. О́tken jyldyń jeltoqsan aıynyń sońynda júrgizilgen molekýlıarlyq-genetıkalyq zertteýlerdiń nátıjeleri boıynsha bir synamada KVI-diń iriktelgen 25 oń synamasynan «Omıkron» shtamy anyqtaldy. Bul jaǵdaı 16 jeltoqsanda shetelden kelgen qala turǵynynda anyqtaldy. Ol PTR testiniń teris nátıjesimen keldi, biraq 22 jeltoqsanda tamaq aýrýymen medısınalyq kómekke júgindi, sodan keıin tekserilip, oń materıaldy tekseriske jiberdik. Mundaı kúrt ósýdiń negizgi sebepteriniń biri – «Omıkron» shtamynyń taralýy jáne azamattardyń qala boıynsha belsendi qozǵalysymen baılanysty, sonymen qatar saqtyq sharalaryn elemeýi, maska taǵý rejimin saqtamaýy, adamdar kóp jınalatyn jerlerge barýy. Eger sizde PTR testi oń bolsa nemese siz naýqastarmen tyǵyz baılanysta bolsańyz, onda siz úı karantıninde bolýyńyz kerek, óıtkeni siz basqalarǵa úlken qaýip tóndirýshi ekenińizdi umytpaýdy suraımyz», delingen Covid-19 taralýyna jol bermeý jónindegi VAK habarlamasynda.
Elordalyq ınfeksıonıst dáriger Elmıra Ádisheva «Omıkron» shtamynyń belgileri týraly aıtyp berdi.
«Koronavırýstyń «Omıkron» shtamy damýdyń ekinshi satysynan ótip, barynsha juqpaly, biraq az patogendilik deńgeıine jetti degen pikir bar. «Omıkronǵa» qatysty suraq áli kóp. Alaıda keıbir oǵan tán sımptomdar belgili. Jańa shtamǵa tán erekshelikterdiń biri – ol koronavırýstyń osyǵan deıin belgili bolǵan shtamdaryna qaraǵanda, dám men ıis sezý joǵalmaıdy. «Omıkronǵa» tán sımptomdar – jalpy álsizdik, tamaqtyń ashýy, dene qyzýynyń kóterilýi, deneniń qaqsap aýyrýy men qurǵaq jótel. Eger osy belgilerdi baıqasańyz, birden dárigerdiń kómegine júgingenińiz jón. О́zdigińizden dıagnoz qoıyp, em qabyldaýǵa bolmaıdy», dedi E.Ádisheva.
Sondaı-aq ınfeksıonıst dáriger jańa shtamdy, sonymen qatar koronavırýstyń basqa da shtamdaryn juqtyrmaýǵa profılaktıkalyq is-sharalardy saqtaý men vaksınalaý ǵana kómektesetinin alǵa tartty.
Rasynda, «Omıkron» shtamy ýshyǵyp turǵan álemniń basqa elderinde koronavırýstyń bul túrine shaldyqqandardyń deni vaksına saldyrmaǵany aıtylyp jatyr. Sondyqtan vaksınalaýǵa samarqaý qaraýǵa bolmaıdy. 10 qańtardaǵy málimet boıynsha Qazaqstanda birinshi komponentpen 9 014 952 adam, ekinshi komponentpen 8 551 099 adam vaksına saldyrdy.
