Ortalyq kommýnıkasııalar qyzmetinde ótken brıfıngide QR Bas prokýratýrasy Qylmystyq qýdalaý qyzmetiniń bastyǵy Serik Shalabaev osyndaı málimet aıtty.
«Búgingi tańda tergeý jedel toptary 546 qylmystyq isti tergeýde. Onyń ishinde 44-i terrorızm aktileri, 34-i jappaı tártipsizdikter, 15-i adam óltirý boıynsha. Ýaqytsha ustaý ızolıatoryna qylmys jasady degen 672 kúdikti ustaldy. Onyń 446-sy sottyń sanksııasymen qamaýǵa alyndy. Qujattardy teksergennen keıin jáne ustaýǵa negiz bolmaǵandyqtan prokýratýra organdary 100-den astam azamatty bosatty. Qazirgi ýaqytta qajetti tergeý amaldar júrgizilýde. Qylmystyq prosester azamattardyń quqyqtaryn qamtamasyz etý maqsatynda Adam quqyqtary jónindegi ýákilmen jáne basqa da quqyq qorǵaý uıymdarynyń ókilderimen ózara árekettesý máseleleri sheshildi. Olarǵa jetkizilgen jáne ustalǵan adamdardy ustaý oryndaryna kirý qamtamasyz etildi. Sol arqyly zańsyz kúsh qoldaný, medısınalyq kómek kórsetpeý jáne qorǵaýshylardy kirgizbeý jaǵdaılaryna táýelsiz tekserý júrgiziledi», dedi Serik Shalabaev.
Sondaı-aq, ol ádiletsizdikke tap boldym dep esepteıtin turǵyndardyń qaıda habarlasý kerek ekenin túsindirdi.
«Respýblıkalyq advokattar alqasymen birlesip ýaqtyly jáne bilikti zań kómegin kórsetý máselesi sheshildi. Qazirgi ýaqytta prokýratýraǵa quqyq qorǵaý organdarynyń áreketine 32 aryz kelip tústi. Bul ótinishter tekserilýde, tıisti sharalar qabyldanady. Eger azamattar óz quqyqtary buzyldy dep eseptese, Bas prokýratýraǵa «115» nómiri boıynsha nemese tikeleı aýmaqtyq prokýratýralarǵa habarlasa alady», dedi Bas prokýratýra ókili.
