Baspasóz konferensııasynda birinshi bolyp sóz alǵan Mektepke deıingi jáne orta bilim komıteti tóraıymy Gúlmıra Karımova: «600-den asa oqýshysy bar qalalyq mektepter qashyqtan oqytady. Bul rette 1-2-synyptar úshin oqytýdyń shtattyq formaty, al 3-5-synyptarda kezekshi synyptar bolady. Syıymdylyǵy 600 oqýshyǵa deıingi qala mektepteri jáne barlyq aýyl mektepteri shtattyq formatta jumys isteıdi. Sanıtarlyq dárigerlerdiń sheshimine baılanysty balabaqshalarda oqytý jáne tárbıeleý jumystary shtattyq formatta júrgiziledi. El boıynsha shtattyq formatta oqıtyn oqýshylar sany 2 mln-nan asady, al qashyqtan oqıtyn oqýshylar sany – 1,5 mln-ǵa jýyq. Iаǵnı oqýshylardyń 60%-y shtattyq formatta, 40%-y qashyqtan oqıdy. Sonymen qatar bul óńirlerde mektepten tys uıymdarda oqytý jeke nemese toptyq sabaqtar kezinde shtattyq rejimde – 10 adamǵa deıin uıymdastyrylady. Arnaıy uıymdarda túzetý kabınetteri, resýrstyq ortalyqtarda múmkindigi shekteýli balalar úshin shtattyq rejimde jumys isteı beredi. Mundaı uıymdarda jumys jeke jáne 8 adamnan aspaıtyn toptarda uıymdastyrylady. Respýblıka boıynsha osyndaı 160 myńnan asa oqýshy bar», dedi.
Komıtet tóraıymynyń aıtýyna qaraǵanda, elorda men Almaty, Shymkent qalalarynda balalar qashyqtan oqıdy, epıdemııalyq ahýal jaqsarsa, oqytýdyń dástúrli formatyna aýysady. Shtattyq formatta jumys isteıtin bilim berý uıymdarynda balalarǵa tamaq beriledi. Shekteý is-sharalary aıaqtalǵanǵa deıin balalar mektepke iskerlik, klassıkalyq stılde yńǵaıly kıimmen bara alady. Úshinshi toqsan 18 naýryzǵa deıin jalǵasady. Al Densaýlyq saqtaý mınıstrligi janyndaǵy basqarmanyń basshysy Maral Rahımjanovanyń málimdeýinshe, COVID-19 taralýyna jol bermeý jónindegi vedomstvoaralyq komıssııanyń sheshimi boıynsha vaksınany tolyq alǵan balalar sabaqty oflaın oqı alady.
Joǵary oqý oryndarynda kóktemgi semestr 24 qańtarda bastalady. Joǵary jáne joǵary oqý ornynan keıingi bilim departamenti dırektory Ádilet Toıbaev ýnıversıtetterde oqytý aralas formatta júrgiziletinin jetkizdi.
«Joǵary oqý oryndary kaskadtyq ádisti qoldana alady, ıaǵnı stýdentterdiń jınaqtalýyn barynsha azaıtý úshin oqýdy bastaý oqý kýrsyna, oqý baǵyttaryna baılanysty 24 qańtar men 6 aqpan aralyǵynda kezeń-kezeńimen uıymdastyrylýy múmkin. Mysaly, 1-kýrs stýdentteri úshin oqý 24 qańtarda bastalsa, 2-kýrs stýdentteri 31 qańtardan, 3-4-kýrs stýdentteri úshin 7 aqpannan bastaýǵa bolady. Kóktemgi semestrde oqytý dástúrli jáne aralas formatta bolady. Atap aıtqanda, joǵary oqý ornynyń sheshimi boıynsha oqý prosesi tolyǵymen dástúrli formatta nemese aralas formatta uıymdastyrylýy múmkin. Sonda dárister onlaın, al praktıkalyq jáne semınar/zerthanalyq sabaqtar oflaın rejimde ótedi. Stýdentterdiń praktıkasy da oflaın rejiminde praktıka bazalarynda júzege asyrylady», dedi Á.Toıbaev.
Departament dırektorynyń aıtýynsha, stýdentterden PTR testin tapsyrý talap etilmeıdi. Biraq Ashyq qosymshasymen ótedi, «jasyl» jáne «kók» mártebesi bar stýdentter ýnıversıtetke emin-erkin kirip-shyǵa alady.
