Aıgúl Múkeı jańa qyzmetke taǵaıyndaldy

Jaqynda taratylǵan «El arna» telekompanııasynyń dırektory Aıgúl Múkeı «Astana Ekspo-2017» Ulttyq kompanııasy» aksıonerlik qoǵamy baspasóz qyzmetiniń jetekshisi bolyp taǵaıyndaldy. Bul týraly ol óziniń Feısbýktegi paraqshasynda habarlady. «Men endi «Astana EKSPO-2017» baspasóz qyzmetiniń jetekshisimin. Dál sol uıymǵa sizderdiń kóp saýaldaryńyz bar, dostar. Birge pysyqtaıtyn bolamyz, qatty synaı kórmeńizder, sonymen qatar sypaıylyq pen ádeptilik saqtaıyq», - dep jazdy ol. Eske sala keteıik, Aıgúl Múkeı bunyń aldynda «El arna» telearnasynyń dırektory qyzmetin atqardy. Arnanyń jabylatynyn Parlament Májilisiniń otyrysynda «2014-2016 jyldarǵa arnalǵan respýblıkalyq bıýdjet týraly» Zańǵa ózgerister men tolyqtyrýlar engizý týraly» zań jobasynyń tanystyrylymy barysynda Ekonomıka jáne bıýdjettik josparlaý mınıstri Erbolat Dosaev habarlaǵan bolatyn. Taǵy bir toqtala ketetin jaıt, bıýdjet jobasyn talqylaý barysynda depýtattar mınıstrden «El arna» telearnasynyń jumysy toqtatylý sebepterin túsindirýdi suraǵan bolatyn. Buǵan jaýap bergen E.Dosaev sonda: «Biz jyl saıyn «El arna» telearnasyna 2 mlrd. teńge bólip keldik. Alaıda, reıtıng boıynsha osy arna 300 mln. teńgeniń ǵana qaıtarymyn jasaı alady, bul - birinshiden. Ekinshiden, Memleket basshysynyń Úkimetke byltyrǵy jyldyń qazan aıyndaǵy keńeıtilgen otyrysynda bergen tapsyrmalary bar. Onda Prezıdent kontent boıynsha suranysqa ıe telearnalardy ǵana qoldaýdy jalǵastyrýdy júktegen bolatyn. Al «El arna» kontenti, ózderińiz biletindeı, jartylaı satyp alynǵan, aýdarylǵan habarlardan quralady, al óziniń jasap otyrǵan kontenti jetkiliksiz», - degendi aıtty. Onyń aıtýyna qaraǵanda, endi «El arnaǵa» bólinip kelgen 2 mlrd. teńgeniń teń jartysy, ıaǵnı 1 mlrd. teńgesi «24.kz» telearnasynyń aımaqtyq tilshiler qosynyn keńeıtýge bólinbekshi. Budan bólek, 992 mln. teńge somasyndaǵy bıýdjet qarajatyn jańa fılmder túsirýge jumsaý qarastyrylyp otyr. Murat Aıtqoja. Derekkóz: Nur.kz.