Saıasat • 21 Qańtar, 2022

Muhtar Tileýberdi qańtar oqıǵasyna baılanysty EQYU ókilderine brıfıng ótkizdi

192 ret kórsetildi

Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Venaǵa jumys sapary barysynda Eýropadaǵy qaýipsizdik jáne yntymaqtastyq uıymynyń (EQYU) Turaqty keńesiniń otyrysynda Qazaqstanda qańtar aıynda bolǵan oqıǵalar týraly brıfıng ótkizdi, dep habarlaıdy Egemen.kz.

M.Tileýberdi EQYU-ǵa qatysýshy elderdiń ókilderin bolǵan oqıǵanyń sebepteri, terrorızmge qarsy operasııanyń nátıjeleri, UQShU bitimgershilik mıssııasy týraly habardar etti.

Qazirgi ýaqytta eldegi jaǵdaı tolyǵymen turaqtanǵanyn jáne Qazaqstan óziniń kópvektorly saıasatyn jalǵastyryp, barlyq halyqaralyq mindettemelerin ustanatynyn erekshe atap ótti.

Mınıstr sondaı-aq, QR Prezıdenti Qasym-Jomart Toqaevtyń jańadan qurylǵan QR Úkimetiniń aldyna qoıǵan eldegi áleýmettik-ekonomıkalyq jaǵdaıdy jaqsartý jónindegi mindetteri, sondaı-aq «Halyq únine qulaq asatyn memleket» tujyrymdamasy aıasynda júrgizilip jatqan saıası reformalardyń jańa paketi týraly habardar etti.

Sapar aıasynda M.Tileýberdi EQYU basshylyǵymen - Bas hatshy Helga Shmıd, Demokratııalyq ınstıtýttar jáne adam quqyqtary jónindegi bıýronyń dırektory Matteo Mekachchı, EQYU BAQ bostandyǵy jónindegi ókili Tereza Rıbeıro, sondaı-aq EQYU Parlamenttik Assambleıasynyń Tóraǵasy Margareta Sederfeltpen ekijaqty kezdesýler ótkizdi. Taraptar buǵan deıin qol jetkizilgen ýaǵdalastyqtardy iske asyrý barysyn talqylap, Memleket basshysynyń jańa reformalary aıasynda odan ári yntymaqtastyqtyń perspektıvalaryn belgiledi.

QR SIM basshysy Aýstrııanyń Eýropalyq jáne halyqaralyq ister jónindegi federaldyq mınıstri Aleksandr Shallenbergpen ekijaqty kezdesý ótkizdi. Olar ózara yntymaqtastyqty nyǵaıtý boıynsha aldaǵy qadamdardy talqylady. Qazaqstan men Aýstrııa arasyndaǵy dıplomatııalyq qarym-qatynastardyń ornaǵanyna 30 jyl tolýyn eskere otyryp, bıylǵy jyly ótetin is-sharalarǵa erekshe nazar aýdaryldy. Taraptar ekijaqty shart-quqyqtyq bazany keńeıtý týraly ýaǵdalasty.

Kelissózder qorytyndysy boıynsha mınıstrler aýstrııalyq jáne sheteldik BAQ úshin birlesken baspasóz konferensııasyn ótkizdi. Oǵan qosa, M. Tileýberdi aýstrııalyq jáne eýropalyq jýrnalıster úshin jeke brıfıng ótkizdi.

Sońǵy jańalyqtar

Uqsas jańalyqtar