Oblystyń bas sanıtarlyq dárigeri Ermuhanbet Dáýletbaev óńirdiń epıdemııalyq ahýaly kúrt qubylyp, sanıtarlyq jaǵdaıdyń kún sanap kúrdelenip bara jatqanyn aıtyp, karantındik shekteý sharalaryn kúsheıtý týraly qaýlysyn qaıta ózgertti. Osylaısha, atalǵan qujatqa osy aıdyń ishinde ekinshi ret ózgeris engizildi.
Eń aldymen qaladaǵy túrli mekemeler men kásiporyndardyń jumys kestesi ózgerýi kerek. Mekeme qyzmetkerleri aýysymǵa bólinip jumysqa ártúrli ýaqytta kelip-ketýi tıis. Sonda qoǵamdyq kólikterde jolaýshylar da azaıyp, indet juqtyrý qaýpi tómendeıdi.
Jańa qaýlyda budan bylaı jabyq ǵımaratta da, ashyq alańda da forým, konferensııa, semınar sııaqty basqosýlar men banket, úılený toıy, mereıtoı sekildi otbasylyq is-sharalardy ótkizýge tyıym salyndy. Sondaı-aq ujymdyq is-sharalar ótkizýge arnalǵan ǵımarattar men jeke úılerdi jalǵa berýge bolmaıdy. Tek Ashyq qosymshasy ornatylǵan qoǵamdyq tamaqtaný oryndarynda ekpe qabyldaǵan 10 adamnan ári aspaıtyn kezdesýler uıymdastyrýǵa jáne jerleý rásiminen keıin as berýge ǵana ruqsat bar. Asqa qatysatyn adamdardyń sany 30-dan ári aspaýy tıis.
Buǵan qosa jabyq ǵımaratta ornalasqan bılıard, kompıýter, boýlıng klýbtary, balalarǵa arnalǵan oıyn alańdary men attraksıondar sııaqty saýyq mekemeleriniń, býkmekerlik keńselerdiń jumysy toqtatyldy.
Sonymen qatar Ashyq jobasyna qatysýshylar sanatynda bar-joǵyna qaramastan, teatrlar, mádenıet úıleri, kórmeler, túngi klýbtar men oıyn klýbtary jabyldy. Ashyq-pen jumys isteıtin kınoteatrlarda kórsetilim kezinde kórermender zalyndaǵy oryndyqtardyń 70 paıyzy bos turýy shart.
Dinı nysandar ashyq bolady. Biraq juma namazy meshitte emes, úıde oqylýy tıis. Shirkeý, sınagoga, soborlarǵa da kópshiliktiń basyn qosyp ǵıbadat rásimderin ótkizýge ruqsat joq.
Al monsha, akvapark, saýna, termopark, basseınder men fıtnes-ortalyqtarǵa, sondaı-aq basqa da kez kelgen sport nysandaryna «jasyldar» ǵana kire alady.
Qostanaı oblysy
