Pavlodar oblysy Polısııa departamentiniń baspasóz qyzmeti málimetinshe, Pavlodarda eki emhana qyzmetkerleriniń vaksınasııa pasportyn qoldan jasaý deregi byltyr shildede anyqtalǵan. Fakt QR QK-nyń 385-baby 2-bóligi «Kólik quralynyń sáıkestendirý nómirin qoldan jasaý, joıý, aldyn ala sóz baılasý arqyly adamdar toby jasaǵan kórineý jalǵan sáıkestendirý nómiri bar kólik quralyn ótkizý» boıynsha tirkelgen. Bul bap boıynsha dárigerlerge 5000 aılyq eseptik kórsetkishke deıin aıyppul salý, ne 1200 saǵatqa deıin qoǵamdyq jumystarǵa tartý, ne shekteý nemese bes jylǵa deıin bas bostandyǵynan aıyrý jazasy kózdelgen.
Tergeýshilerdiń aıtýynsha, dárigerler aqyly túrde júzdegen jalǵan qujat jasaǵan. Polısııa kúdiktilerdiń arasynda menedjer, dáriger jáne eki medbıke bar ekenin aıtty. Byltyr qarashada jergilikti emhananyń medbıkeleriniń biri jalǵan ekpe tólqujattaryn satqany úshin 160 000 teńge alǵany belgili boldy. Alaıda pavlodarlyq dárigerlerdiń isi sotqa deıin jetpegen. Sotaldy tergep-tekserý barysynda medısına qyzmetkerleri raqymshylyq jasaý týraly ótinish bergen.
«QR QK-niń 11-baby 2-bóligine sáıkes, QR QK-niń 385-baby 2-bóliginde kózdelgen qylmystyq quqyq buzý deregi aýyrlyǵy ortasha qylmystarǵa jatady jáne osy zańnyń qoldanylý aıasyna jatady. «Qazaqstan Respýblıkasy Táýelsizdiginiń otyz jyldyǵyna baılanysty raqymshylyq jasaý týraly» QR zańynyń zańdy kúshine enýine baılanysty qylmystyq ister QR QIJK 35-baby 1-bóligi 3-tarmaǵy negizinde toqtatyldy», dedi vedomstvonyń baspasóz qyzmeti.
