Bul qundy jádiger murajaıǵa deıin Jańaarqa aýdanyndaǵy Sáken aýylynda Jaqyp degen kisiniń qolynda bolǵan. Kise belbeý − kúmispen bezendirilip, qaltashalar salynǵan jalpaq bylǵary jáne qaıystan jasalyp, eki qabat etilip tigilgen. Taza kúmisten jasalǵan pyshaǵy men eki basyna qapsyrma salynǵan. Onda ilip ótkizip qoıatyn bylǵary tórtburyshty qalta bar, ony qarý-jaraqqa nemese basqada qajetti usaq-túıekterdi salý úshin paıdalanady. Oǵan qaltamen qosymsha oqshantaı, kishkene sopaqsha dorba jáne pyshaq, qanjar salatyn qynap taǵylady.
Burynǵy zamanda kise belbeý – adamnyń áleýmettik dárejesin tanytyp qana qoımaı, ádemi buıym retinde de toı-tomalaqqa taǵyp baratyn baǵaly zat sanaldy. Adamdar ony barqyttan, oqa jiptermen kestelep, altyn, marjan tastardan kóz saldyryp jasatqan.
Qazaqy dástúrde Kise belbeýdiń erekshe orny bar, onyń jasalýy da san qyrly bolyp keledi. Ol bir sheberdiń týyndysy ǵana emes, ulttyq bolmysymyzdyń ǵajaıyp kelbetin aıshyqtaıdy.
