Atalǵan oıynda toptyq kezeńdegi alǵan sary qaǵazyna baılanysty Edson men Taınan alańǵa shyqqan joq. Kezdesý barysynda alǵashqy mınýttan qazaqstandyq fýtzalshylardyń basymdyǵy baıqaldy. Degenmen olarǵa sáttilik jetpeı jatty. Esesine ýkraınalyq fýtbolshy 14-mınýtta qazaqstandyq quramanyń aıyp alańynda qulap, tóreshi penaltı belgiledi. Ony Pıotr Shotýrma múlt jibermeı, osylaısha Ýkraına alǵa shyqty.
Ekinshi kezeńde ýkraınalyq Mıhaıl Zvarych 29-mınýtta basymdyqty arttyrdy. Odan keıin 33-mınýtta qazaqstandyq quramadan Dýglas Jýnıor esep aıyrmasyn qysqartsa, 37-mınýtta Birjan Orazov mergendik tanytty. Budan keıin ýkraınalyq quramadan Vladımır Razývanov 38, Iаroslav Lebed 39-mınýtta bos qalǵan qaqpaǵa gol soǵyp ketti.
Osylaısha Qazaqstan qarsylasyna 3:5 esebimen jol berdi. Endi jarysty Ýkraına quramasy jalǵastyrady. Eske salsaq, Qazaqstan quramasy V tobynda synǵa tústi. Alǵashqy oıynda Slovenııamen (4:4) teń túsip, odan keıin Fınlıandııany (6:2) jáne Italııany 4:1 esebimen tize búktirdi. Nátıjesinde 7 upaımen birinshi oryn aldy. Búgin shırek fınalda Portýgalııa Fınlıandııadan 3:2 esebimen basym túsip, jartylaı fınalǵa shyqqan alǵashqy qurama atandy.
Endi 1-aqpanda Ispanııa men Slovakııa, Reseı men Grýzııa sheberlik baıqasady. Jartylaı fınaldyq oıyndar 4 aqpanǵa belgilengen. Al 6 aqpanda fınal jáne 3-oryn úshin oıyndar bolady.
Eýropa chempıonaty 1996 jyldan beri turaqty túrde ótkizilip keledi. Búginge deıin Ispanııa - 7, Italııa - 2, Reseı men Portýgalııa 1 márte chempıon atandy.
Aıta ketsek, Qazaqstan quramasy buǵan deıin Eýropa chempıonaty fınaldyq satysynda eki márte synǵa tústi. 2016 jyly - 3, 2018 jyly 4-oryn aldy.
