Jıynda sóz alǵan Bilim jáne ǵylym salasyndaǵy sapany qamtamasyz etý komıtetiniń tóraǵasy Gúlzat Kóbenova:
«Bilim berý baǵdarlamalary úsh blokqa biriktirilgen (túlekterdiń mansaptyq bolashaǵy, bilim berý baǵdarlamalarynyń sapasy jáne bilim alýshylardyń jetistikteri syndy) 19 krıterıı boıynsha baǵalandy. Zertteý kórsetkendeı, jumys berýshilerdiń JOO-daǵy bilim berý baǵdarlamalarynyń sapasy men ózektiligine qanaǵattaný kórsetkishi 28 paıyzǵa artqan. JOO bilim berý baǵdarlamalarynyń 85%-y jumys berýshilermen kelisilgen. Baǵdarlamalardyń 88%-y agenttikterde akkredıtteýden ótti. Jumysqa ornalasqan túlekterdiń sany ótken jylmen salystyrǵanda 12%-ǵa artyp otyr. Osylaısha, 2021 jyly jumyspen qamtý ortasha eseppen 77%-dy qurady. Sonymen qatar praktıkaǵa baǵdarlanǵan mamandyqtar úshin oqý prosesine praktıkalyq tájirıbesi bar oqytýshylardy tartý boıynsha oń úrdis baıqalady. Praktık-oqytýshylardyń sany 75%-ǵa deıin kóbeıgen», dedi.
Buǵan deıin Bilim jáne ǵylym mınıstrligi otandyq joǵary oqý oryndaryna shtattyq qyzmetkerler emes jáne ǵylymı dárejesi joq praktık-mamandardy jumysqa shaqyrý boıynsha zańnamaǵa ózgerister engizgen bolatyn. Osydan soń ýnıversıtetter óndiris oryndarynyń bilikti mamandaryn oqytýshylyq qyzmetke tarta bastady.
Al «Atameken» ulttyq kásipkerler palatasy (UKP) basqarma tóraǵasynyń orynbasary Oljas Ordabaev bilim berý baǵdarlamalarynyń sapasyn jumys berýshiler baǵalaǵanyn jetkizdi.
«Reıtıng aıasynda 2000 bilim berý baǵdarlamasy baǵalandy, 73 071 túlektiń jumysqa ornalasýy taldandy, Qazaqstannyń barlyq óńirinen 200-den asa salalyq sarapshy tartylyp, nátıjesinde 105 joǵary oqý orny boıynsha 2 myń saraptamalyq qorytyndy jasaldy. Zertteýde eń negizgisi túlekterdiń mansaptyq bolashaǵy, jumysqa ornalasý deńgeıi, jumys izdeý jáne ortasha jalaqysyna den qoıyldy. Derekter joǵary oqý oryndarynyń anyqtamalaryna emes, zeınetaqy aýdarymdaryna súıenip alyndy. Osydan soń bilim berý baǵdarlamalarynyń sapasyna basymdyq berildi. Bilim berý baǵdarlamalaryna jumys berýshiler, belgili bir sektordaǵy tájirıbeli sarapshylar baǵa berdi. Tórt jyl ishinde óte jaqsy tájirıbe jınaqtaldy. Prosess avtomattandyrylǵan. Stýdentter qaı pánderdi oqıdy jáne ár pán boıynsha qandaı taqyryptar, belgili bir pánge qansha saǵat bólý kerek, osyǵan nazar aýdaryldy», dedi O.Ordabaev.
«Atameken UKP ókiliniń aıtýynsha, 2019 jyldan bastap jumysqa ornalasý deńgeıi ósip keledi. Tek 2020 jyl qıyn jyl boldy, oǵan pandemııa sebep. Jumysqa ornalasý deńgeıi 2019 jylǵa qaraǵanda tómendedi, al qazir jaǵdaı túzele bastady. El boıynsha jumysqa ornalasý kórsetkishi 77%-ǵa jetti. 2019 jyly túlekterdiń jalaqy deńgeıi 101 myń teńgeni qurasa, qazir 127 myń teńgege kóterilgen.
Sonymen, Reıtıng-2021 qorytyndysy boıynsha: «Densaýlyq saqtaý jáne áleýmettik qamtamasyz etý» baǵyty boıynsha jetekshi oryndy S.Asfendııarov atyndaǵy QazUMÝ ıelendi, al Ońtústik Qazaqstan medısına akademııasy álsizder qatarynda. Zań salasynda M.Nárikbaev atyndaǵy KAZGIýÝ dástúrli túrde kósh bastap keledi. «Pedagogıkalyq ǵylymdar» baǵyty boıynsha L.N.Gýmılev atyndaǵy Eýrazııa ulttyq ýnıversıteti aldyńǵy orynda, Shymkent qalasyndaǵy A.Qýatbekov atyndaǵy Halyqtar dostyǵy ýnıversıteti, «Syrdarııa» ýnıversıteti tómengi orynda tur. «Aqparattyq-kommýnıkasııalyq tehnologııalar» baǵytynda HATÝ, al «Aýyl sharýashylyǵy jáne bıoresýrstar» boıynsha M.Qozybaev atyndaǵy SQÝ aldyńǵy orynda tur. «Jaratylystaný ǵylymdary, matematıka jáne statıstıka», «О́ner jáne gýmanıtarlyq ǵylymdar» jáne «Áleýmettik ǵylymdar, jýrnalıstıka jáne aqparat» sııaqty úsh baǵyt boıynsha S.Toraıǵyrov ýnıversıteti kósh bastap keledi. Elimizdegi kópsalaly joǵary oqý oryndary arasyndaǵy jalpy reıtıngte L.N.Gýmılev atyndaǵy Eýrazııa ulttyq ýnıversıteti, S.Toraıǵyrov ýnıversıteti, Qazaqstan-Nemis ýnıversıteti úzdik atandy. Beıindi JOO arasynda Nárikbaev atyndaǵy KAZGIýÝ ýnıversıteti úzdik boldy. Sondaı-aq Qazaqstan-Brıtan ýnıversıteti, Narhoz ýnıversıteti, Halyqaralyq aqparattyq tehnologııalar ýnıversıteti, KIMEP ýnıversıteti sııaqty joǵary oqý oryndary aldyńǵy qatarda tur. Kelesi joǵary oqý oryndary ádettegideı aýtsaıderler qatarynda: akademık A.Qýatbekov atyndaǵy Halyqtar dostyǵy ýnıversıteti, Ortalyq Azııa ınnovasııalyq ýnıversıteti, «Syrdarııa» ýnıversıteti, Shymkent ýnıversıteti.
Reıtıng qorytyndysy bilim berý baǵdarlamalaryn jetildirý boıynsha jumys atqarmaǵan joǵary oqý oryndary aýtsaıderler qataryna qosylǵanyn kórsetip otyr. Ádette bul ýnıversıtetter bilim berý baǵdarlamalaryna ınvestısııa az bóledi, praktık-oqytýshylardy kóp tartpaıdy jáne jyl saıyn UBT/KT-da tómen ball jınaǵan abıtýrıentterdi oqýǵa qabyldaıdy.
