Ábdijámil Nurpeıisov 1924 jyldyń 22 qazanynda Qyzylorda oblysynyń Aral aýdany Qulandy poselkesindegi Úshkóń aýylynda týǵan. Ol qazaq ádebıetine zor úles qosqan sýretkerlerdiń biri, qoǵam qaıratkeri.
Ábdijámil Kárimuly Nurpeıisov 1942 jyly orta mektepti bitirgennen keıin áskerge shaqyrylyp, Ekinshi dúnıejúzilik soǵysqa qatysty. Qysqa merzimdi kýrstardy bitirgennen keıin Ońtústik jáne Prıbaltıka maıdanynda, Lýgansk túbinde mınomıot rotasynda saıası qyzmetker, keıin shtabıst retinde Baltyq mańynda Kýrlıand plasdarmyndaǵy shaıqastarǵa qatysty.
Jazýshy estelik kitabynda ózi týraly «1943 jyldyń naýryz aıynda leıtenant boldym. Áýeli ushqyshtar kýrsyn oqyttym. Kýrs maǵan qıyn boldy. Áýege kóterilgen kezde de, ushaqty qondyrý da maǵan qıynǵa soǵatyn», dep jazǵan.
Jazýshy 1946 jyly armııa qatarynda júrip, «Kýrlıandııa» romanyn jazyp shyqqan. Romandy bitire salysymen bir jyl Qazaq memlekettik ýnıversıtetinde bilim alǵan. 1954 jyly Máskeýdegi M.Gorkıı atyndaǵy Ádebıet ınstıtýtyna túsip, ony 1956 jyly bitirgen.
1962-1964 jyldary «Juldyz» jýrnalynyń bas redaktory bolyp qyzmet etti. Qazaq SSR-i Joǵarǵy Keńesiniń depýtaty boldy. 1964 jyldan bastap uzaq jyldar boıy biryńǵaı shyǵarmashylyqpen aınalysyp, halyqaralyq PEN klýbyn uıymdastyrǵan.
Dara jazýshy ádebıet álemindegi eleýli eńbegi úshin kóptegen marapattarǵa ıe bolǵan. 1974 jyly ol KSRO memlekettik syılyǵynyń laýreaty, 2001 jyly Máskeýdegi Halyqaralyq Ádebı qordyń «Za chest ı dostoınstvo», 2003 jyly Halyqaralyq M.Sholohov atyndaǵy syılyqtardyń laýreaty atanǵan. Qyzyl Juldyz, Qyzyl Tý, «Qurmet Belgisi» ordenderimen jáne medaldarmen marapattalǵan.
Ábdijámil Nurpeıisovtiń «Qan men ter» trılogııasy, basqa da shyǵarmalary otyz shaqty shetel tiline aýdarylyp, álem ádebıetshileriniń úzdik baǵasyna ıe boldy.
Ol, sondaı-aq, SSSR Memlekettik syılyǵynyń ıegeri. Aıta ketsek, bul mártebeli syılyqty Qazaqstanda tek úsh qalamger - Muhtar Áýezov, Ábdijámil Nurpeıisov pen Juban Moldaǵalıev qana aldy.
