Esesine Beıimbet Maılın aýdanynyń ortalyǵy Áıet aýylynda salynǵan tóbeshik syrǵanaq jergilikti jurttyń renishin týǵyzyp, onyń sońy úlken daýǵa aınaldy. Byltyr ákimdik jarııalaǵan konkýrsty utyp alǵan merdiger 2 mln teńgedeı bıýdjet qarjysyna ortalyq alańǵa syrǵanaq ornatyp, janyna birneshe muz músin jasap berýdi moınyna alǵan. Alaıda aýyl turǵyndary syrǵanaqtyń sapasyz ekenin ári jańa jyl merekesi ótip ketkennen keıin salynǵanyn aıtady.
– Byltyr 31 jeltoqsanǵa deıin aýylda syrǵanaq turǵyzady degendi estidik. Oǵan jergilikti bıýdjetten qomaqty qarjy qarastyrylǵanyn da bilemiz. Jańa jyl qarsańynda aǵash syrǵanaqty ákelip qoıdy. Biraq baspaldaqtary qısyq, taqtaıy súrgilenbegen, balalar bir jerin jaraqattap ala ma dep qorqamyz. Bul syrǵanaqqa otyrǵan balany súırep túsirmeseń, kedir-budyr taqtaıdyń ústinde ózdiginen syrǵanaı almaıdy. Tipti bolmaǵan soń, jurt munyń janyna qardan taǵy bir tóbeshik jasalady eken dedi. Sóıtip júrgende jańa jyl merekesi ótip ketti. Biraq eshqaısymyz aǵashtan jasalǵan sapasyz syrǵanaqtan ózge syrǵanaqty kóre almadyq, – deıdi aýyl turǵyny Galına Fırýs.
Turǵyndar memlekettik satyp alý saıty arqyly jańa jyl qarsańynda aýyldy bezendirýge qansha qarjy bólingenin izdestirip kóredi. Saıttaǵy málimet boıynsha, aýyl ákimdigi jeke kásipkerlikpen aınalysatyn «Martın» degen mekememen úsh birdeı kelisimshartqa otyrypty. Birinshi shartta merdigerdiń ylǵal ótkizbeıtin súrilgen aǵashtan syrǵanaq jasaıtyny týraly aıtylǵan. Oǵan 1 mln 450 myń teńge qarastyrylypty. Odan keıingisinde merdigerge 104 myń 150 teńgege bıiktigi bir jarym metr bolatyn birneshe muz músin jasaý júktelgen. Al úshinshi shartta qardan bıiktigi 1,5 metr, uzyndyǵy 5 metr, eni 2 metr bolatyn taǵy bir syrǵanaq jasaý úshin 248 myń teńge bólinipti.
– Eki syrǵanaq pen muz músinderdi qosqanda barlyǵy 2 mln teńgege jýyq qarajat bólingen. Biraq qar syrǵanaq 13 qańtarda ǵana salyndy. Al muz músinderdiń ornynda tórt buryshty kesek qana jatyr. Aýyl turǵyndary bıýdjettiń aqshasyn izdestirmegende, bul syrǵanaqtyń salynýy da neǵaıbyl edi. Merdiger qardy qalaı bolsa solaı úıe salypty. Qardan jasalǵan muz syrǵanaǵynyń túri osy. Mundaıyn bilgende, aýyl turǵyndary jabylyp kók tıyn shyǵyndamaı-aq syrǵanaqty qoldan jasap alar edik. Ákimge «úıilip jatqan borpyldaq qardyń ústimen balalar qaıtyp syrǵanaıdy» dep edik, áıteýir bir kúnnen keıin sý quıyp, qatyryp qoıypty. Meniń bes nemerem bar. Beseýi de munda kelmeıdi, Pıoner kóshesindegi aýyl turǵyndary ózderi jasap alǵan muz tómpeshikke barady. Ol alasalaý bolsa da, bıýdjettiń aqshasyna jasalǵan syrǵanaqtan áldeqaıda jaqsy, – deıdi aýyl turǵyny Janat Maqumova.
Merdiger Denıs Martın 31 jeltoqsanǵa deıin Áıet aýylynda qar qalyń bolmaǵanyn, osy sebepti syrǵanaq turǵyzýǵa jetetin qar taba almaǵanyn aıtady.
– Men ákimdikke kepildik hat jazyp, syrǵanaqty qar jetkilikti mólsherde túskennen keıin turǵyzatynymdy habarladym. Al syrǵanaqty sapasyz degenderge aıtarym, biz buǵan apta saıyn sý quıyp, retke keltirip otyramyz. Bálkim balalar bir jetiniń ishinde osyndaı jaǵdaıǵa jetkizgen bolar. Jurttyń renishin estip jatyrmyn. Muz músinderdiń bireýin ornatyp qoıǵam, biraq ony tótenshe jaǵdaı rejimine baılanysty qaıta buzyp tastadyq, – deıdi merdiger.
Aýyldyq okrýg ákimdigi merdigerdiń eshbir aıyby joq ekenin aıtyp otyr. Al Áıettiń belsendi turǵyndary prokýratýra men sybaılas jemqorlyqqa qarsy is-qımyl qyzmetine shaǵymdanyp, syrǵanaqqa qatysty tekserý júrgizýdi talap etpek.
Qostanaı oblysy
